Qostanaı oblysyndaǵy eldi mekenderde jabaıy túlkiler júr
ASTANA. KAZINFORM – Qostanaı oblysynyń Jitiqara aýdanynda jabaıy túlkilerdiń eldi meken aýmaǵynda jıi kórinýi tirkeldi. Tipti, túlkiniń adamǵa shabýyl jasaǵany týraly habarlandy.
Jitiqara aýdany ákimdigi jabaıy janýardyń adamǵa shabýyl jasaǵanyn rastady. Zardap shekken turǵynǵa qajetti medıtsınalyq kómek kórsetilip, vaktsına egildi. Densaýlyǵy turaqty, aýrýhanaǵa jatqyzý qajet bolǵan joq.
Aýdandyq veterınarııa bóliminiń málimetinshe, turǵyndar mundaı jaǵdaıda saq bolýǵa tıis. Eskertý men jadynama taratýǵa qaramastan, keıbir azamattar áli de jabaıy janýarlardy óz betimen ustap, eldi mekenderge ákelip júr.
Mamandardyń aıtýynsha, mundaı áreketter asa qaýipti jáne juqpaly aýrýlardyń taralýyna ákelýi múmkin.
Orman sharýashylyǵy jáne janýarlar dúnıesi ınspektsııasy jaǵdaıdyń turaqty baqylaýda ekenin málimdedi. Vedomstvo jabaıy ańdardyń adamdarǵa jıi jaqyndaı bastaýy olardyń sanynyń kóbeıýi men tabıǵı mekendeý ortasynyń tarylýymen baılanysty ekenin túsindirdi.
Qyzmet ókilderi azamattarǵa jabaıy janýarlarǵa jaqyndamaýdy jáne tisteý, tyrnaý nemese basqa da jaraqat alǵan jaǵdaıda dereý medıtsınalyq kómekke júginýdi eskertedi.
Eske salaıyq, buǵan deıin Mańǵystaý oblysynda jergilikti turǵyndy qańǵybas mysyq tistep, áıel adam qutyrý derti saldarynan kóz jumǵan edi.