Qostanaı oblysyndaǵy bir aýylda ıtten qutyrma deregi anyqtaldy
ASTANA. KAZINFORM – Qostanaı oblysynyń Sarykól aýdanynda jeke úı aýlasyndaǵy ıtten qutyrma deregi tirkeldi. Osyǵan baılanysty eldi mekenniń bir bóliginde shekteý sharalary engizildi, dep habarlaıdy agenttiktiń tilshisi.
Ashyq NQA portalynda jarııalanǵan qujatqa sáıkes, shekteý veterınarııalyq is-sharalardy júrgizý úshin engizilgen. Qutyrma deregi jergilikti turǵynǵa tıesili ıtten anyqtalǵan.
Shekteý engizý týraly qaýly 2025 jylǵy 9 shildede QR Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń aýdandyq aýmaqtyq ınspektsııasynyń bas memlekettik veterınarııalyq-sanıtarııalyq ınspektorynyń usynysy negizinde «Sarykól kenti ákiminiń apparaty» memlekettik mekemesimen ázirlengen.
Maqsat – oshaqtyń kózin joıý jáne veterınarııalyq ahýaldy qalpyna keltirý úshin qajetti veterınarııalyq-sanıtarııalyq sharalardy júzege asyrý.
Aıta keteıik, Óskemende bir aptada 20-dan astam adamdy ıt qapty.