Qostanaı oblysynda aýyl sharýashylyǵy kórmesi bastaldy
ASTANA. KAZINFORM — Qostanaı oblysynda «Jańa Dala / Qarqyn ‘2025» halyqaralyq aýyl sharýashylyǵy kórme-demonstratsııasy óz jumysyn bastady. Bul týraly AShM málim etti.
Jınaý naýqany qarsańynda dástúrli túrde ótkiziletin bul kórme ozyq aýyl sharýashylyǵy tehnologııalaryn, zamanaýı tehnıkany, mal sharýashylyǵyndaǵy, selektsııadaǵy, organıkalyq eginshiliktegi, veterınarııa men ósimdikterdi qorǵaýdaǵy jetistikterdi kórsetýge arnalǵan tıimdi alańǵa aınaldy.
Qatysýshylar qatarynda – 20 elden kelgen mashına jasaý kompanııalarynyń ókilderi, aýyl sharýashylyǵy tehnıkasyn óndirýshiler men jetkizýshiler, agrarlyq ǵalymdar, fermerler, asyl tuqymdy sharýashylyq mamandary, memlekettik organdardyń, qarjy ınstıtýttarynyń jáne agrarlyq birlestikterdiń ókilderi bar.
Kórmeniń negizgi is-sharalarynyń biri – alǵash ret dándi daqyl egistikterinde ótkiziletin «Astyq 2025» konferentsııasy boldy. Onda 500-den astam qatysýshy – fermerlik sharýashylyqtar men treıderlerden bastap, dándi jáne maıly daqyldardy óńdeýshilerge deıin – 2024/25 jylǵy agrarlyq maýsymnyń qorytyndysyn jáne 2025/26 jylǵy boljamdardy talqylanyp jatyr.
Qurmetti qonaqtar arasynda – Qazaqstandaǵy Moldova Respýblıkasynyń Tótenshe jáne Ókiletti Elshisi Shtefan Gorda.
– Biz organıkalyq aýyl sharýashylyǵynda, selektsııada, turaqty logıstıkalyq dálizderdi qurýda birlesken jobalardy iske asyrýǵa daıynbyz. Qazaqstan naryǵy Moldova úshin mańyzdy, jáne biz qazaqstandyq kompanııalardy ınvestıtsııalyq yntymaqtastyqqa shaqyramyz, – dep atap ótti ol.
Eki kúndik is-sharaǵa 320-dan astam qaıta óńdeý kásipornyn biriktiretin «Ýzegmoısanoat» qaýymdastyǵynyń ókilderi qatysýda.
– Bizdiń kompanııalar jyl saıyn Qazaqstannan 200 myń tonnadan astam shıkizat jáne 150 myń tonnadan astam daıyn maı ımporttaıdy. Biz jetkizýshilermen tikeleı baılanystardy keńeıtýge jáne jańa kelisimsharttar jasasýǵa múddelimiz, – dedi ózbek delegatsııasynyń basshysy Alısher Mahmýdov.
Sonymen qatar, «Jańa Dala / Qarqyn ‘2025» baǵdarlamasy aıasynda veterınar mamandarynyń respýblıkalyq sleti, veterınarlyq qaýipsizdik máseleleri boıynsha dalalyq keńes, ǵylymı-praktıkalyq is-sharalar, aýyl sharýashylyǵy drondary men zamanaýı tehnıkany kórsetý jáne basqa da sharalar uıymdastyrylady.
Al Batys Qazaqstan oblysynda 26–27 shildede «AGROFEST — 2025» festıvali ótti.