Qostanaı oblysynda 16 shaǵyn eldi meken áli jaryqsyz otyr

ASTANA. KAZINFORM – Qostanaı oblysynda sý tasqyny saldarynan 196 úı jaramsyz bolyp qalǵan. Bul týraly Qostanaı oblysy ákiminiń orynbasary Erlan Spanov aıtty.

«Oblystyń eki qalasynda jáne 4 aýdanynda tótenshe jaǵdaı jarııalandy. Atalǵan óńirlerdiń barlyǵynda zardap shekkenderge zalaldy óteý boıynsha komıssııalar qurylyp, jumys istep jatyr. Tólem týraly sheshimderdi komıssııalar jyljymaıtyn, jyljymaly múlik pen maldy baǵalaý jáne tehnıkalyq tekserýden keıin qabyldaıtynyn atap ótken jón. Osylaısha, búgingi kúni 354 úı tekserildi. Onyń ishinde 158 úı qalpyna keltirýge jatady. Olar boıynsha baǵalaý júrgizilgennen keıin zalal somasy tólenetin bolady. Qalpyna keltirilmeıtin úıler sany – 196. Bul azamattar úımen qamtamasyz etiledi», - dedi ol Ortalyq kommýnıkatsııalar qyzmetindegi brıfıngte.

Onyń aıtýynsha, óńirde sý tasqyny saldarynan 971 mal óldi. 214 bas malǵa tólemaqy tólendi.

«Elektr jelileriniń 1 414, sonyń ishinde 52 joǵary voltty tiregi zaqymdalǵan. Barlyq iri eldi mekenderde elektrmen jabdyqtaý qalpyna keltirildi. 16 shaǵyn eldi meken áli kúnge deıin elektr qýatynsyz otyr. Qazirgi ýaqytta smeta ázirlendi. Qajetti materıal, tirekter daıyndalýda. Jaqyn arada jumystar qolǵa alynady. Zardap shekken halyqqa áleýmettik qoldaý jumystary sý tasqynynyń alǵashqy kúnderinen bastap júrgizilýde. 828 ótinish boıynsha 187 mln teńge tólendi. Ótinishterdi qabyldaý jumysy jalǵasýda», - dedi Erlan Spanov.