Qostanaı balabaqshalaryna elektrondy kezek engizildi
Búgingi taӊda elimizdiń birneshe qalasynda balabaqshalarǵa kezekke turýdyń elektrondy júıesi engizilgen. Endi bul qatarǵa Qostanaı qosyldy. QR Bilim jáne ǵylym mınıstrliginiń elektrondy kezekke qoıýdyń biryńǵaı talaptary týraly 2017 jylǵy buıryǵyna sáıkes, balalardy balabaqsha kezegine qoıýdyń júıesi jańarǵany málim.
«7 jasqa deıingi balalardy balabaqsha kezegine elektrondy tirkeý jumystary pılottyq rejımde sátti aıaqtaldy. Qazirgi kúni jańa júıege 24 memlekettik jáne 43 jekemenshik balabaqsha qosyldy. Balabaqshaǵa qujattardy tapsyrý, balalardy qabyldaý protsesteri avtomattandyrylǵan. Bul óz kezeginde sybaılas jemqorlyqtyӊ aldyn alýǵa tıimdi ádis. Bir jaǵynan ata-ana men bilim bólimderi arasynda tikeleı baılanysty azaıtyp, ata-analarǵa úıinde otyryp elektrondy túrde ótinish jasaýǵa múmkindikter týǵyzdy. Negizi, kez kelgen ata-ana garden.kst-goo.kz veb-portalyna óziniń JSN engizip, balaǵa qatysty málimetterdi ornalastyrady. Budan keıin, bos oryndar týraly málimetterdi baqylap otyrý qajet. Eger uıaly telefonyńyzǵa bos oryn týraly aqparat kelse, 3 kúnniń ishinde balabaqshany tańdap, joldamany rásimdeısiz. Úsh kúnniń ishinde joldamany almasańyz sizdiń kezegińizge basqa azamattar úmitker bolady. Ótinish toltyrýǵa, joldama berýge bilim bóliminiń mamandary aralasa almaıdy. Búginde Qostanaıda 8900 bala elektrondy kezekte tur»,- dedi Vasılıı Tsymbalıýk.
Bólim basshysynyń aıtýynsha, jalpy «Tsıfrlyq Qazaqstan» baǵdarlamasy aıasyndaǵy is-sharalarǵa qalalyq bilim bóliminen 17 mıllıon teńgeden astam qarjy bólindi.