Qostanaı aýrýhanasyna zamanaýı medıtsınalyq qurylǵylar ákelindi
Oblystyq balalar aýrýhanasynyń dárigerlerine endi jańa týǵan nárestelerdi kútip-baǵý jeńildeıdi. Sebebi, «Aıala» qaıyrymdylyq qory Astana kúni qarsańynda «Ómir syılaıyq» atty jobanyń aıasynda jańa medıtsınalyq jabdyqtar satyp aldy. Zamanaýı qurylǵylardy tapsyrý rásimine oblys ákimi Arhımed Muhambetov pen «Aıala» qaıyrymdylyq qorynyń medıtsınalyq jobalar jetekshisi Berik Dárjanov qatysty.
«Jyl sanap oblystaǵy densaýlyq saqtaý mekemeleriniń materıaldyq-tehnıkalyq bazasy nyǵaıtylýda. Elbasymyz densaýlyq saqtaý salasyndaǵy qyzmetterdiń sapasyn jaqsartý boıynsha naqty tapsyrmalar bergen bolatyn. Sol tapsyrmalar bizdiń oblysta da qarqyndy oryndalyp jatyr. Óńirde kóptegen medıtsına nysany kúrdeli jóndeýden ótti. Bul jumystar áli de jalǵasady. Bıyl tek osy maqsattarǵa 2,7 mlrd teńge qarjy bólindi. Jańadan medıtsınalyq qurylǵylar satyp alynyp jatyr. Solardyń biri - Elordanyń 20 jyldyq merekesi qarsańynda elimizge tanymal «Aıala» qaıyrymdylyq qory qostanaılyqtarǵa erekshe syı jasady. Qor ujymyna aıtar alǵysymyz sheksiz», - dedi oblys ákimi.
Sonymen, oblystyq balalar aýrýhanasyna aýyr jaǵdaıda ómirge kelgen nárestelerdi emdeý jáne kútip-baǵý úshin Amelie dep atalatyn qarqyndy terapııa ınkýbatory ornatyldy. Quny 6 mln 700 myń teńge turatyn qurylǵy aýa temperatýrasyn jáne ylǵaldylyǵyn baqylaýdyń ozyq júıesimen jabdyqtalǵan. Al, quny 4 mln 460 myń teńge bolatyn Amenis ashyq jan saqtaý júıesin dárigerler merziminen buryn dúnıege kelgen sábılerdiń jaǵdaıyn jaqsartý úshin paıdalana alady. Sondaı-aq, qor oblystyq balalar aýrýhanasyna Amelix úsh fototerapııa shamyn syıǵa tartty. Jabdyqtyń quny - 2 mln 940 myńge. M20 aptsıentteriniń eki monıtory ınkýbatorǵa jáne ashyq jan saqtaý júıesine qosymsha alynyp otyr. Bul monıtorlar qarqyndy terapııadaǵy naýqastardyń fızıologııalyq jaǵdaılaryn baqylaýǵa múmkindik beredi. 