Qostanaı ákimi óńirdegi tsıfrlandyrýdyń jarqyn úlgilerin atady
«Qostanaı oblysy elimizdegi astyqtyń jalpy kóleminiń 22 paıyzyn óndiredi. Sondyqtan oblysymyz «Tsıfrlyq Qazaqstan» memlekettik baǵdarlamasyn iske asyrý sheńberinde aýyl sharýashylyǵyn tsıfrlandyrý boıynsha «Pılottyq joba» retinde belgilengen bolatyn» - dedi Arhımed Muhambetov OKQ-da ótken brıfıng barysynda.
Aımaq basshysy jýrnalısterdiń nazaryn «aqyldy sút fermasy» jobasyna, et fermalaryna, núkteli egin sharýashylyǵy júıelerine aýdardy.
«Aqyldy et fermasy» jobasy «Qostanaı oblysynyń et klasteri» jobasynyń operatory bolyp tabylatyn iri jáne tehnologııalyq jaǵynan daıyndalǵan «Terra» JShS fermasynyń bazasynda júzege asyrylýda. Jalpy sany shamamen 9 myń iri qara mal basyn quraıdy. Qazirgi kezde sharýashylyqta tsıfrlandyrýdyń kelesi elementteri engizilgen: RFID (Erefaıdı) qulaq bırkilerin ornatý, azyqtandyrýdy baqylaý júıesi, tıimsiz janýarlardy anyqtap shyǵarý, ushqyshsyz ushý apparaty. Ekonomıkalyq tıimdiligi - bir jylda 122 tonna qosymsha et alý jáne jemniń 10% únemdeý bolyp otyr», - dedi oblys ákimi.
Aımaq basshysynyń aıtýyna qaraǵanda, «Aqyldy sút fermasy» jobasy «Olja Sadchıkovskoe» JShS 770 saýyn sıyry tabynyna arnalǵan mal sharýashylyǵy kesheni bazasynda iske asyrylýda.
«Osy jyldyń sáýirinde iri qara maldyń fızıologııalyq jaı-kúıleri men PH-ortasyn, analyq mal basynyń ýaqtyly uryqtandyrylýyn jáne onyń ónimdiligin qadaǵalap otyrýǵa múmkindik beretin «SMAKSTEK» (Smaxtec) avstrııalyq avtomattandyrylǵan júıesi engizildi. Atalǵan is-sharalardyń tıimdiligin biz jyl qorytyndysy boıynsha bir saýyn sıyrynan saýylatyn súttiń 6-dan 7 tonnaǵa deıin ulǵaıǵandyǵynan jáne 100 analyqtan tól alýdyń 70-ten 90-ǵa deıin óskenin kórip otyrmyz», - dedi ol.
Sondaı-aq, oblys aýmaǵynda «Naqty egin sharýashylyǵy júıesin engizý» jobasy eki «pılottyq» kásipornynda («Sadchıkovskoe» JShS jáne «Troıana» JShS) engizilýde. Tájirıbelik alqaptar kartogrammasy jasalyp, olarǵa egis kezinde mıneraldyq tyńaıtqyshtar saralanyp engizilgen.
«Qosarlas júrgizý tehnologııalaryn engizý jónindegi tehnıka parki jańǵyrtyldy, janar-jaǵarmaıdy esepke alatyn jáne tehnıkany ornynan aýystyrý esebin júrgizetin datchıkter ornatyldy. Egin shyǵymdylyǵynyń, ylǵaldylyǵynyń, dán bastyrýdyń onlaın monıtorıngi júıesi engizile otyryp, egin jınaý tehnıkasy qaıta jaraqtandyryldy. Sonymen birge, qosymsha, oblysta janýarlardy chıpteý jáne elektrondyq epızootııalyq kartalaryn jasaý tehnologııalary engizilýde», - dep túıdi Arhımed Muhambetov.
