Qosshy turǵyndarynyń kóbi elorda emhanalaryna júginýge májbúr - mınıstr
Qosshy qalasynyń №1 qalalyq emhanasynda jeti ýchaske boıynsha 12 myń adamǵa qyzmet kórsetiledi. Klınıka basshylyǵymen áńgimelesý barysynda mınıstr mektep medıtsınasy, aýrýlardy erte satysynda anyqtaý máselelerin kóterip, san emes, sapaly profılaktıkalyq tekserýlerdiń qajettiligin atap ótti. Ol kadrlardy daıarlaýǵa, olardy MSAK deńgeıinde úzdik tájirıbelerge úıretýge, jas dárigerlerdi áleýmettik qoldaýǵa nazar aýdardy.
Qalanyń 22 830 turǵyny tirkelgen «Januıa» KSMK-de 130 medıtsına qyzmetkeri, onyń ishinde 36 dáriger, 68 orta býyn mamany medıtsınalyq kómek kórsetedi, sondaı-aq quramynda 2 feldsherlik-akýsherlik pýnkt bar. Medıtsınalyq obektini aralaý kezinde mınıstr basqarýdaǵy tásilderdi ózgertýdi, halyqpen jumystyń tıimdiligin arttyrý, turǵyndardyń ótinishteri boıynsha basym suranystaryn anyqtaý, perspektıvalyq baǵyttardy ashýdy usyndy. Mysaly, bul travmatologııalyq pýnkt bolýy múmkin.
Qosshyda qazir 80 myńnan astam adam turady. Olardyń kóbi áli de elordalyq dárigerlerge júginýge, ıaǵnı Astanaǵa qatynaýǵa májbúr.
«Qazir munda eki qalalyq emhana – jeke jáne memlekettik emhana ornalasqan. Alaıda, osy medıtsınalyq uıymdarǵa bekitilgen halyq sany – qala turǵyndarynyń jartysynan sál astamy ǵana. Qalǵan adamdar áli de elordaǵa barýǵa májbúr bolyp otyr. Demek, Densaýlyq saqtaý basqarmasymen birlesip jergilikti turǵyndar úshin medıtsınalyq qyzmetterdi naqty qoljetimdi etý úshin kadrlarmen qamtamasyz etý, tehnıkalyq jaraqtandyrý máselelerin sheshý qajet», - dedi Ajar Ǵınııat.
Mınıstr Qosshy qalasynyń turǵyndarymen kezdesý ótkizdi, sodan keıin azamattardy jeke qabyldady. Kezdesý barysynda jergilikti medıtsınalyq mekemelerdiń mamandarmen jáne jabdyqtarmen qamtylýyna qatysty suraqtar qoıyldy. Jedel járdem, mektep medıtsınasy, bosandyrý qyzmeti máseleleri talqylandy.
Jeke qabyldaýda azamattar emhanaǵa jatqyzýdyń qoljetimdiligi jáne shuǵyl medıtsınalyq kómektiń sapasy boıynsha problemalarmen júgindi. Vedomstvo basshysy árbir ótinishke tolyq túsinikteme berip, birqatar máselelerdi jeke baqylaýǵa alyp, vedomstvonyń beıindi departamentteri men jergilikti atqarýshy organdarǵa qoıylǵan máselelerdi sheshýdi pysyqtaýdy tapsyrdy.
