Qosshy qalasynyń ákimi taǵaıyndaldy

KÓKShETAÝ. QazAqparat - Aqmola oblysynyń ákimi Ermek Marjyqpaevtyń ókimimen Qosshy qalasynyń ákimi taǵaıyndaldy, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.

Ǵaıdar Qasenov Atbasar aýdanynyń týmasy. S.Seıfýllın atyndaǵy agrarlyq ýnıversıtetti, L.N. Gýmılev atyndaǵy Eýrazııa ulttyq ýnıversıtetti, Halyqaralyq bıznes akademııasyn támámdaǵan. Ekonomıka ǵylymdarynyń kandıdaty.

Eńbek jolyn 1998 jyly Astana qalasy Almaty aýdany ákimi apparatynyń bas mamany bolyp bastaǵan. 2001 jyldan 2006 jylǵa deıin kommertsııalyq qurylymdarda basshylyq laýazymdarda jumys istedi. 2006-2008 jyldary Astana qalasy Almaty aýdany ákiminiń orynbasary, keıin aýdan ákimi qyzmetterin atqarǵan.

2008-2015 jyldary «Qaztemirtrans»AQ Korporatıvtik damý jónindegi vıtse-prezıdenti bolyp jumys istedi. Taǵaıyndalǵanǵa deıin Aqmola oblysy Shortandy aýdanynyń ákimi bolyp eńbek etti.

Eske sala keteıik, 2021 jylǵy 27 shildede QR Prezıdenti Qasym-Jomart Toqaev Aqmola oblysynyń ákimshilik-aýmaqtyq qurylysyndaǵy ózgerister týraly Jarlyqqa qol qoıdy. «Qazaqstan Respýblıkasynyń ákimshilik-aýmaqtyq qurylysy týraly» Qazaqstan Respýblıkasynyń 1993 jylǵy 8 jeltoqsandaǵy Zańynyń 9-babyna sáıkes Aqmola oblysynyń Tselınograd aýdany odan oblystyq mańyzy bar qala mártebesin alǵan Qosshy aýylyn bólý jolymen qaıta uıymdastyryldy.