Qosshy qalasynyń eki turǵyny eki aıdan beri tabylmaı jatyr

KÓKShETAÝ. KAZINFORM – Aqmola oblysynda osydan eki aı buryn joǵalyp ketken Qosshy qalasynyń eki turǵyny izdestirilýde. 

Aýmaqtyq PD baspasóz qyzmetiniń málimetinshe, bıylǵy jyldyń 7 aqpanynda Qosshy qalalyq PB-ne 43 jastaǵy áıel ótinishpen júginip, 26.06.2004 jylǵy uly Abylaıhan Darynuly Erkinovti taýyp berýin ótingen. Anasynyń sózinshe, uly qańtardyń 23-inde Astana qalasyna qydyryp ketken.

Joǵalǵan adamnyń boıy 168 sm, dene bitimi ortasha, shashy qara, qysqa qıylǵan. Ústine qara shápki, qara shalbar, qara aıaqkıim kıgen. 

Sonymen birge, osy jyldyń 13 aqpanynda saǵat 20:00 shamasynda Qosshy qalalyq PB-ne 41 jastaǵy áıel júginip, 36 jastaǵy inisin izdeýge kómek suraǵan. Ol 6 qańtarda úıinen shyǵyp, qaıtyp oralmaǵan. Ol ústine kók kýrtka, qara shápki, djınsy, aq krossovka kıgen. 

Joǵalǵan adamdardyń ekeýi de buryn úıinen ketip qalyp júrgender. 

«Qosshy qalalyq PB Krımınaldy polıtsııa bólminiń qyzmetkerleri joǵalǵan adamdardy Astana qalasynan izdedi, biraq odan nátıje shyqpady. Olardy izdeýge Aqmola oblysy PD jeke quramy men eriktiler tartyldy», - dedi vedomstvodan.

Osy rette, polıtsııa joǵalǵan adamdarǵa qatysty qandaı bir málimeti bar adamdar bolsa, dereý «102» arnaıy jelisi nemese 8-(716-51) 79-721, 8-708-354-03-82, 8-705-657-65-55, 8-702-520-40-00 telefon nómirleri boıynsha habarlasýdy suraıdy.

Aıta ketsek, budan buryn Kókshetaýda iz-túzsiz joǵalǵan áıelge izdeý jarııalanǵanyn jazǵan edik.