Kóshpendiler oıyny: Resmı túrde sporttyq saıystar túri bekitildi

ASTANA. KAZINFORM – 2024 jyly 8-14 qyrkúıek aralyǵynda Astana qalasynda uıymdastyrylatyn V Dúnıejúzilik kóshpendiler oıyndarynyń sporttyq saıystary resmı túrde bekitildi.

Týrızm jáne Sport mınıstrligi málim etkendeı, Dúnıejúzilik kóshpendiler oıynynda sporttyń 20 túrinen kil myqtylar anyqtalady.

Atap aıtsaq, asyq atý, ordo, arqan tartys, báıge, kókpar, aýdaryspaq, teńge ilý, qazaq kúresi, alysh, kýrash, ashyrtmaly aba gıýreshı, ssırym, mas-restlıng, Powerfull nomad (kúshtilerdiń saıysy), toǵyzqumalaq, mangala, ovarı, dástúrli sadaq atý, jamby atý, qusbegilikten saıystar ótedi.

Sondaı-aq, 10 kórneki sport saıysynan jarystar ótkizý josparlanǵan.

Kóshpendiler oıyndarynyń saltanatty ashylý rásimi «Astana Arena» stadıonynda ótedi.

Aıta keteıik, Dúnıejúzilik Kóshpendiler oıyndary – etnıkalyq, dástúrli sport túrleri boıynsha ótetin halyqaralyq jarys. 2014, 2016 jáne 2018 jyldary Qyrǵyzstannyń Sholpan Ata qalasynda ótse, 2022 jyly Túrkııanyń Iznık shaharynda tórtinshi Dúnıejúzilik oıyndar uıymdastyryldy.