Kóshpendiler oıyndarynyń saltanatty ashylýy «Astana arenada» ótedi
ASTANA. KAZINFORM – 8 qyrkúıekte «Astana arena» stadıonynda jyldyń eń aýqymdy sporttyq sharasy V Dúnıejúzilik kóshpendiler oıyndarynyń saltanatty ashylý rásimi ótedi. Qazirgi ýaqytta ǵımaratqa kúrdeli jóndeý jumystary júrgizilýde.
Kóshpendiler oıyndary elordanyń 7 ǵımaratynda ótedi. Qazir onyń úsheýi – «Astana arena» stadıony, «Alaý» muz saraıy jáne Ippodromda qaıta jańǵyrtý jumystary júrgizilýde.
«Astana arena» stadıony men «Alaý» muz aıdynynyń rekonstrýktsııasyna 29 mlrd teńge bólingen.
«Astana Arena» stadıony 2009 jyly ashylǵan jáne buǵan deıin rekonstrýktsııa jumystary júrgizilmegen. Munda 30 myńnan astam adam syıady. Byltyr Kóshpendiler oıynyna daıyndyq úshin demontaj jumystary bastaldy, sodan beri jóndeý jumystary kezeń-kezeńimen júrgizilip keledi. Munda 10 tamyzǵa deıin negizgi jumystar aıaqtalady jáne 20 tamyz kúni tolyǵymen paıdalanýǵa berilýi qajet», - dedi Astana qalalyq Qurylys basqarmasy basshysynyń orynbasary Nurdáýlet Qurbanbekuly.
Qazirgi ýaqytta «Astana Arenada» 500-den astam jumysshy kúni-túni eki aýysymda qarqyndy jumys isteýde. Qurylys materıaldary da – otandyq ónim, Astana, Temirtaý, Atyraý qalalarynan jetkizilgen.
«Rekonstrýktsııa bolǵandyqtan, ǵımarattardyń barlyq fýnktsıonaly saqtalady, tek materıaldary jańartylyp, ınjenerlik jelileri aýystyrylyp, kelýshiler men sportshylarǵa yńǵaıly bola túsedi. Syrttaǵy abattandyrý, árleý, vıtrajdar qoıý jáne aǵash egý jumystary tolyǵymen aıaqtalyp qaldy. Іshki bóliginde de ár qabatta jóndeý jumystary júredi, stadıonnyń shatyry aýystyrylady. Al gazon Kóshpendiler oıyny aıaqtalǵan soń aýysady», - dep túsindirdi basqarma ókili.
Kóshpeliler mádenıetiniń biregeı merekesi sanalǵan álemdik oqıǵa dástúr men zamanaýı jetistikterdi nasıhattaý maqsatynda álemniń túkpir-túkpirinen qatysýshylar men kórermenderdiń basyn biriktiredi.
Álemdik sport sharasyna 89 elden 2000-nan astam sportshy qatysady dep kútilip otyr. Astanada ótetin Dúnıejúzilik kóshpendiler oıyndarynda 21 sport túrinen 97 medal jıyntyǵy sarapqa salynady.
