Kóshpendiler oıyndary: amerıkalyq kovboılar kókpar oınaýǵa kele jatyr
ASTANA. KAZINFORM – Amerıkalyq kovboılar komandasy Qazaqstanǵa V dúnıejúzilik kóshpendiler oıyndaryna qatysady. AQSh quramasynyń kapıtandary Vashıngtonnan jolǵa shyǵar aldynda Ortalyq Azııa halyqtarynyń sporttyq dástúri jaıly agenttiktiń menshikti tilshisimen tildesken edi.
Kókpar jáne kókbóriden «USA Kokpar Team» amerıkalyq komandasynyń kapıtany Ledd Hoýell (Ladd Howell) jylqyǵa bala kúninen qumar ekenin jáne AQSh-taǵy kásibı rodeo-kovboıyn jaqsy kóretinin aıtty.
Kókpar men kókbóri týraly alǵash 2018 jyly dostary YouTube-tan vıdeo kórsetken kezde bilgen.
«Dosym maǵan bir vıdeony kórý kereksiń dedi. Ony 5 mınýt qaradym da aýzym ashylyp qaldy. Men kórgen eń keremet kórinis boldy. Eki aıdan soń Vaıomıngtegi dostarymnyń biri Qyrǵyzstanda ótken ІІІ dúnıejúzilik kóshpendiler oıyndaryna qatysýǵa shaqyrdy. Sóıtip alǵash 2018 jyly oınadym jáne maǵan unady. Bul mádenıet pen sport túri unaıdy», - dep esine aldy Ledd Hoýell.
AQSh ulttyq quramasy kapıtanynyń aıtýynsha, olarda mundaı oıyn túri joq, biraq Amerıkada rodeo-kovboı keńinen taralǵan. Onda balalardy kovboı bolýǵa erte jastan baýlyp, jattyǵýǵa jáne jylqylardy kútip baptaýǵa úıretedi. Bul júzdegen jyldar boıy álemniń basqa tóńireginde oınalatyn kókpar men kókbórige uqsas.
«Bul dástúrli oıynnyń qanshalyqty keremet jáne erekshe ekenin túsiný óte mańyzdy. Mádenıetimizdi biriktirýge tyrysamyz, jylqy kópir sekildi, bárimizdi biriktiredi. Jylqy – barshaǵa ortaq halyqaralyq til sekildi, sondyqtan biz sport pen mádenıetti unatamyz», - deıdi ol.
Sonymen qatar kapıtan amerıkalyq komandanyń sporttyq saıystarǵa daıyndalýdyń keıbir sátterine toqtaldy. Atap aıtqanda, «USA Kokpar Team» oıyndarǵa óz jylqylaryn ákele almaıdy, attardy qazaqstandyq tarap beredi.
«Biz jylqylardy kórýdi asyǵa kútemiz. Olarmen jarystan birer kún buryn jattyǵý jasap, qaısysy shabýylǵa shyǵady jáne qaısysy qorǵanysta bolatynyn anyqtaımyz», - dep bólisti L. Hoýell.
Onyń aıtýynsha, komanda músheleri AQSh-tyń ártúrli shtatynan, sondyqtan da bári bir jerge jınalyp jattyǵý ótkizý qıyn. Degenmen árkim óz betinshe jylqymen daıyndalǵan.
USA Kokpar Team-nyń ekinshi kapıtany Skott Tsımmerman (Scott Zimmerman) komanda sátti oıyn kórsetip, aldaǵy oıynda jeńisten úmitti.
«Biz Batys Amerıkanyń kovboı mádenıetimen bólise alatynymyzǵa, sondaı-aq Ortalyq Azııa elderiniń mádenıetin qabyldaı alatynymyzǵa senimdi bolǵymyz keledi. Biz Qazaqstan týraly jáne bizge buıyrǵan osy biregeı múmkindik týraly aıtqymyz keledi», - dedi Skott Tsımmerman.
Sondaı-aq Skott Tsımmerman Amerıkada kókpar men basqa oıyndardy nasıhattaýǵa tyrysyp júrgenin aıtty. Onyń pikirinshe, bul mádenıet kópshilikke ásirese Batys Amerıka mádenıetindegi kovboılarǵa unaýy tıis. Sol maqsatta ıaǵnı Ortalyq Azııa mádenıeti men onyń etnıkalyq sport túrlerin jaqsy túsiný úshin olar kóshpendiler oıyndaryna qatysýdy jalǵastyrýda. Kóshpendiler oıyndary qıyn sport túrleri bolsa da, amerıkalyqtar jarysty asyǵa kútedi.
«Ózim qalaǵan sport túrinde tezirek baq synaǵym, atqa otyryp shapqym keledi», - deıdi S. Tsımmerman.
Esterińizge sala keteıik, V Dúnıejúzilik kóshpendiler oıyndary Astana qalasynda 8-13 qyrkúıek aralyǵynda ótedi.
Dúnıejúzilik kóshpendiler oıyndarynda 89 memlekettiń sportshylary baq synaıdy.
Taıaýda Memleket basshysy Qasym-Jomart Toqaev V Dúnıejúzilik kóshpendiler oıyndaryna daıyndyq jóninde keńes ótkizdi.
Aıta ketsek, dúnıejúzilik kóshpendiler oıyndarynda tuńǵysh ret barlyq qurlyqtyń ókili baq synaıdy.
