«Kóshpendiler eshkimge uqsamaıtyn ózindik ozyq mádenıet úlgisin jasady» - respýblıkalyq basylymdarǵa sholý
***
Ústimizdegi jyldyń 11 aqpanynda Qazaqstan Respýblıkasy men Germanııa Federatıvtik Respýblıkasynyń arasyndaǵy dıplomatııalyq qarym-qatynas ornaǵanyna 20 jyl tolǵan edi. Germanııa Qazaqstannyń táýelsizdigin tanyǵan Eýropadaǵy alǵashqy elderdiń biri boldy. Biz GFR-di Eýropadaǵy negizgi seriktesimiz retinde qarastyramyz, al Qazaqstan Germanııa úshin Ortalyq Azııadaǵy basymdyq beretin memleket bolyp tabylady.
Osy oraıda «Egemen Qazaqstan» gazetiniń búgingi sanynda Qazaqstannyń Germanııadaǵy Tótenshe jáne ókiletti elshisi Nurlan Onjanovtyń «Ózara tıimdi qarym-qatynasqa óris keń» degen taqyryppen maqalasy basyldy. «Búgingi kúnde Qazaqstan men Germanııa arasyndaǵy barlyq salalardaǵy yntymaqtastyq qarqyndy damyp keledi, eń joǵary deńgeıdegi pármendi saıası únqatysý qoldaý tabýda. Úkimetaralyq, parlamentaralyq jáne partııaaralyq baılanystar, sondaı-aq ǵylymı, iskerlik, shyǵarmashylyq ıntellıgentsııa toptary arasyndaǵy únqatysý ózara qurmet, senim jáne ashyqtyq negizinde turaqty túrde nyǵaıyp keledi», - dep jazady maqala avtory.
***
«Alash aınasy» gazetiniń turaqty «Dat!» aıdarynda tarıh ǵylymdarynyń doktory, professor Zardyhan Qınaıatulymen aradaǵy suhbat «Kóshpendiler eshkimge uqsamaıtyn ózindik ozyq mádenıet úlgisin jasady» degen taqyryppen berilgen. Basylym tilshisiniń barlyq saýalyna tushymdy jaýap bergen ol: «Menińshe, bizde jastardy «úlkendi syılaý» degen túsinikpen basyp tastaǵan. Ǵylymda da, ónerde de, toıda da qarttardy alǵa shyǵarady. Toıda alǵa shyqsyn-aq, bas tartylsa batasyn jasasyn-aq. Al ǵylymda, bilimde, ónerde jastardy nege alǵa shyǵarmasqa? Meıli ol on toǵyz jastaǵy bala bolsyn, oıy ozsa alda júrýi tıis», - deıdi.
Qazaqstandyq kásipqoı boks sheberi Gennadıı Golovkın AQSh-ta polıak jigiti Gjegoj Proksany sulatp salyp, Amerıkany tamsandyrdy. Bul jaıynda «Alash aınasy» gazetiniń búgingi sanyndaǵy «Golovkın AQSh-ty tamsandyrdy» degen taqyryptaǵy maqalada baıandalǵan. Basylymnyń atap ótýinshe, bul WBA tujyrymy boıynsha orta salmaqtaǵy chempıondyq ataq salynǵan jekpe-jek edi. Bul jekpe-jekte qazaqtyń kómir men kenge baı saıyn dalasynan shyqqan Gennadıı Golovkın men Polshanyń qarýly jigiti Gjegoj Proksa qolǵap túıistirdi. «Proksa da júrekti eken, jekpe-jek bastalmaı jatyp «men Golovkındi nokaýtpen jeńemin» dep jar saldy. Sodan bolar, biz «jekpe-jek qalaı óter eken» dep qobaljyp ta júrdik», - dep jazady basylym.
***
«Aıqyn» gazetiniń jazýynsha, álem kardıohırýrgteri donor tapshylyǵyna oraı dabyl qaǵyp jatyr. Sebebi sońǵy kezde dúnıejúzi boıynsha júregin almastyrý otasyn kútip júrgen naýqastar kóbeıip barady. Olar júrek transplantatsııasyna deıin jasandy júrekpen ómir súrýge májbúr. Al jasandy júrek naýqastyń ǵumyryn ary ketse 2 jylǵa uzarta alady. Maqala «Memleketaralyq donorlar banki qurylsa...» degen taqyryppen berilgen.
***
Kókshetaýda oqý jyly janjaldan bastaldy. Bir joǵary oqý ornynyń stýdentteri urys-keris jasap, polıtsııa qyzmetkerin jaralady, dep habarlaıdy «Ekspress-K» gazeti «Den znanıı zakonchılsıa poboışem» atty taqyryppen berilgen materıalda. Basylymnyń atap ótýinshe, tóbeles «Eýrazııa» túngi klýbynyń mańynda bastalǵan kórinedi. Oqıǵa ornyna birinshi bolyp jaıaý sholǵynshylar keledi. Olar eki jaqqa bólinip, judyryqtasyp jatqan 20 shaqty jigitti jan-jaqqa ajyratýǵa tyrysqan eken. Jigitterdiń biri sol kezde 20 jasar polıtsııa qyzmetkeriniń sol jambasyna pyshaq salady. Abyroı bolǵanda oqıǵa ornyna qosymsha kúsh kelip, tóbeleske qatysqandardyń barlyǵy ustaldy. ІІD baspasóz qyzmetiniń málimetinshe, jastar sol túni Bilim kúnin merekelep júrgen kórinedi.
