Kóshedegi shańda grafen bar – feık
Instagram-da kóshedegi shańda grafenniń bar ekenin dáleldeıtin vıdeo tarady. Avtor kólik kapotynyń ústindegi shańdy jınap, ústinen magnıt ótkizedi, nátıjesinde sur shańnan qara bólshekter bólinedi. Rolıkte olardy grafen dep ataıdy. Bul jaǵdaıdy stopfake.kz anyqtap kórdi, dep habarlaıdy Kazinform.
Grafen – bul kómirtektiń allotropty modıfıkatsııasy, qalyńdyǵy bir atom bolatyn altyburyshty jasýshalary bar tor túrindegi kómirtek atomdarynyń qabaty.
Bul anyqtama kómirtek atomdarynan turatyn, biraq atom torynyń qurylymy basqasha kómir, grafıt pen almaz sııaqty grafenniń de magnıtke tartylmaıtynyn túsindiredi.
Postta jazylǵandaı, grafen – jaqsy ótkizgish, biraq ol magnıtke tartylmaıdy. Máselen, elektr togyn jaqsy ótkizetin sý, ol da magnıtke tartylmaıdy.
Búgingi tańda grafendi jappaı óndirý óte qıyn, bul materıaldyń qunyn arttyrady. Ashyq málimetterge sáıkes, naryqta grafenniń ortasha baǵasy bir grammy úshin shamamen myń dollardy quraıdy. Mundaı qymbat materıaldy kóshedegi shańǵa ne úshin qosatyny túsiniksiz. Onyń ústine, álemde grafendi qalalar men aýyldarda shańmen aralastyrý úshin qajetti kólemde óndirýge bolatyndaı óndiristik qýattar men tehnologııalar jetkiliksiz.
Demek, vıdeoda kórsetilgen magnıtke tartylatyn bólshekter grafen emes. Vıdeodaǵy shań avtomobıldiń kapotynan jınalǵanyn eskersek, magnıtke avtomobıldiń metall bólshekteri tartyldy dep paıymdaýǵa bolady. Sonymen qatar kadrlarda mashınanyń qaı jerde turǵany kórinbeıdi, ol metall shańy bar jerde, mysaly, zaýyttyń nemese metallýrgııalyq kásiporynnyń janynda turǵan shyǵar.
Munyń bári taralǵan vıdeonyń feık ekenin kórsetedi. Kadrlarda kórsetilgen bólshekter grafen emes, óıtkeni bul materıaldy óndirý qıyn, qymbat jáne ol magnıtke tartylmaıdy.
