Koronavırýstyń jańa tolqyny: Ǵalym Qazaqstandaǵy jaǵdaıǵa pikir bildirdi
«Іndet barsha álem úshin tosyn jaǵdaı boldy. Qazirgi kezde 200-ge jýyq memleket qıyndyqtarǵa tap boldy. Dıagnostıka men emdeý tásili únemi ózgerip turdy. Basqa ınfektsııalar boıynsha tıisti emdeý tájirıbesi qalyptassa, al bul jaǵdaıda tájirıbe protsess barysynda jınaqtaldy. Sondyqtan bizdiń bir top mamandarymyz ózge elderdiń ǵalymdarymen birlese jumys istedi. Vırýstan emdeýdiń bastapqy kezeńinde qamtylǵan preparattardyń kóbisi birtindep tizimnen shyǵaryldy, sebebi olardyń tıimdiligi tómen ekeni anyqtaldy. Elimizde antıbıotıkterdi paıdalanýdan keri áser boldy. Óıtkeni, indetke shaldyǵý deńgeıi kúrt ósken kezde, dárihanalarda dári-dármek tez arada azaıyp ketti, adamdar arasynda dúrbeleń oryn aldy. Osy oraıda turǵyndar ózin-ózi emdeýmen aınalysyp, sonyń keri áserine tap boldy, ıaǵnı baýyr men ózge de múshelerge salmaq túsirdi. Atap aıtqanda, álemdik ári otandyq tájirıbeniń arqasynda emdeý hattamasynda dárilik preparattar tizimi azaıtyldy», - dedi Vıacheslav Lokshın.
Onyń sózine qaraǵanda, búginde indettiń jeńil formalaryna em-dom qajet emestigi dáleldendi. Osy oraıda paratsetomol alyp, suıyqtyqty kóbirek ishýge keńes berilgen.
«Sonymen qatar, amerıkalyq «Remdesıvır» preparatyna úmit artqan edik, alaıda málimetter boıynsha preparat tıisti nátıje bermeı otyr. Endi birqatar el daıarlap jatqan vaktsınadan nátıje kútemiz. Bul sharalarǵa Qazaqstannyń da ǵalymdary úlesin qosýda. Synaq jumystarynyń úshinshi kezeńi júrip jatyr jáne onyń barlyǵyn mańyzdy dep sanaımyn», - dedi ǵalym.
Munymen qosa ol júkti áıelderdi emdeý sharalaryna jeke toqtaldy.
«Koronavırýsqa shaldyqqan júkti áıelder úshin em-dom hattamasyn daıarladyq. Olardyń sany Qazaqstanda 2 myńǵa jýyq. Infektsııanyń uryqqa áseri etpeıtini qýanyshty jaǵdaı, biren-saran balaǵa indet juqty. Negizinen, ınfektsııa platsenta arqyly juqpaıdy. Sonymen qatar, jynys jasýshalaryna áseri joq ekeni dáleldendi», - dedi V. Lokshın.
Ǵalymnyń aıtýynsha, koronavırýs pnevmonııasymen aýyrǵan júkti áıelderge qatysty problema boldy.
«Qazirgi kezde mamandar tobymen tıisti hattamany ázirledik, onda qajetti preparattardy der kezinde berý tártibi eskerilgen. Álem elderinde indettiń taralýynyń jańa tolqyny bastalǵanyn baıqap otyrmyz. Bul turǵyda vırýs mýtatsııaǵa ushyrady, sondaı-aq adamdar karantın talaptaryna jaýapkershilikpen qaramaı jatyr dep sanaımyn. Adamdar maska taqpaı júrgenin baıqaýdamyz, bul óz kezeginde aýrýdyń jańa aınalymyna alyp kelýde. Taǵy bir mańyzdy jaıt – ol birtindep ımmýnıet qalyptasýda. Eger halyqtyń 60-70 paıyzy aýyrsa, onda indet kúrt tómendeıdi. Sebebi aýrýǵa shaldyǵý tizbegi úziledi, bul da mańyzdy faktor. Osy oraıda aldaǵy ýaqytta vaktsına men ımmýnıtet indettiń taralýyna tosqaýyl bola alady», - dedi dáriger.
Bul rette ol áleýmettik araqashyqtyqty saqtaý, maska taǵý men gıgıena talaptaryn oryndaýǵa erekshe mán berý kerek ekenin atap ótti.
«Meniń oıymsha, Qazaqstanda indettiń jańa tolqyny jeńildeý bolady, óıtkeni maýsym men shilde aılary kezeńinde adamdardyń kóbisi aýyrdy. Statıstıka boıynsha 106 myń adam aýyrdy. Menińshe, bul kórsetkish 10 ese artyq bolýy múmkin, turǵyndardyń kóbisi úıinde em-dom qabyldady. Olarǵa qatysty dıagnostıka jasalmady ári analız de tapsyrmady. Árıne, biz qazir maýsymdyq tumaýǵa qarsy vaktsına ektirýimiz kerek. Ahýal eki jaǵdaıda túzelýi múmkin. Birinshiden, sapaly vaktsına arqyly, ony aldaǵy jyldyń basynda alýymyz yqtımal. Ekinshiden, ımmýnıtet múmkindigimen tejeýge bolady, alaıda bul protsess uzaqqa sozylady. Aldaǵy jyldyń jaz aılaryna qaraı qalyptasýy múmkin», - dedi sarapshy.
