Koronavırýsty qaıta juqtyrmaıtynyńa eshqandaı kepildik joq – Almaz Sharman
«Koronavırýspen aýyryp, jazylǵandar báribir qaýipsizdik sharalaryn saqtaýlary kerek. Sebebi, koronavırýstan basqa da biraz ınfektsııalar bar. Ásirese qazir, tumaý maýsymy bastalyp jatyr jáne aýrýdyń aldyn alyp, eskertý mańyzdy. Tipti eger siz aýyryp, jazylǵan kúnde de koronavırýs muryn qýysynda bolýy múmkin jáne vırýs qol arqyly berilýi múmkin. Mine, sol sebepti de maskanyń qalaı bolǵanda da tıimdiligi bar. Áleýmettik qashyqtyqtyń da mańyzy zor. Álemde koronavırýsty qaıtadan juqtyrýdyń 5 oqıǵasy belgili boldy. Osyndaı faktiler bar. Sol sebepti, qaıtadan juqtyrýdyń bolmaıtynyna 100 paıyz kepildik joq», - dep atap ótti A.Sharman.
Onyń aıtýynsha, zertteýlerge sáıkes, aýyryp, jazylyp shyqqandarda antıdene paıda bolyp, damıdy. Biraq, soǵan qaramastan onyń qansha ýaqyt saqtalatyny belgisiz.
«Aýrý juqtyrǵandardyń báriniń ımmýnıteti nyǵaıatyny - belgili nárse. Biraq, sonymen birge, basylý (sóný) fenomeni de bar, antıdenelerdiń bastapqyda tsıkly joǵary bolady, biraq nelikten ekeni belgisiz, keıinnen tómendep ketedi. Alaıda taǵy bir úshinshi jaǵdaı bar, ol - vırýstyń mýtatsııaǵa ushyraıtyny, ol ózgerip otyrady. Soǵan qaramastan, onyń ózgerip otyratyny, dereý kúsheıip, bolmasa álsireıtini týraly dálelder bar», - dep atap ótti professor.
Qala turǵyndarynyń aldyn alý sharalaryn kúsheıtý qajettigi týraly aıtqan qazaqstandyq professor maskany qoldaný kezinde ony durys taǵý kerektigin eskertti.
«Maska taǵý óte mańyzdy. Biraq, maskany durys taqqan jón. Men kóp adamnyń maskasyn murnyn ashyp, ıegine taǵyp júretinin jıi kóremin. Bárine únemi vırýstyń kóbi muryn qýysynda bolatynyn eske salamyn, jaı ǵana aýyzdy jabý arqyly olar ne ózderin, ne basqalardy qorǵamaıdy. Sol sebepti maska taǵý jáne ony durys taǵý mańyzdy. Ekinshiden, maska taǵý arqyly siz tek ózińizdi ǵana qorǵap qoımaı, basqalardy da oılaısyz. Úshinshiden, adam kóp jınalatyn oryndardan aýlaq júrýge tyrysý qajet. Eýropa men AQSh-ta nege ekinshi tolqyn bastalyp ketti. Kúnniń salqyndaýyna baılanysty, adamdar ǵımarat ishinde jıi otyratyn boldy. Nátıjesinde, adamdar toptasady, al kóp ǵımarattardyń jeldetilýi qıyn. Bul temekiniń tútini sııaqty. Eger sen aýasy jeldetilmeıtin bólmede otyrsań, temekiniń tútini bólmede aınalyp júredi. Eger ǵımaratta vırýsty juqtyrǵan adam bolsa, vırýsy bar aerozol aýada taralyp, basqalarǵa juǵady. Sol sebepti adam kóp jınalatyn oryndardan, ásirese, jabyq ǵımarattardan aýlaq júrip, bólmeni jeldetip, qashyqtyq saqtaý kerek. Osy erejelerdi saqtaý arqyly ózińdi aýrýdan qorǵaýǵa bolady», - dep qorytyndylady A.Sharman.