Koronavırýstan jazylǵan naýqastar PTR tapsyrýǵa mindetti emes

NUR-SULTAN. QazAqparat – Koronavırýs sımptomdary basylǵan naýqas qaıtadan PTR testileý tapsyrýǵa mindetti emes. Bul týraly elordalyq №5 qalalyq emhana dırektory Altynshash Tabyldına jaýap berdi, dep habarlaıdy QazAqparat.

«Naýqastyń dene qyzýy túsip, sońǵy úsh kúnde qaıta kóterilmese, sımptomdary azaıyp, ózge belgiler mazalamaıtyn bolsa, qaıtadan PTR testileý tapsyrýǵa mindetti emes. Dárigerler ony baqylaýdan bosatady», - dedi dáriger Ortalyq kommýnıkatsııalar qyzmetinde ótken onlaın brıfıngte.

Spıkerdiń aıtýynsha, COVID-19 vırýsy tabylǵan biraq sımptomy joq naýqastar 14 kún boıy dárigerler baqylaýynda bolady.

«Eger 14 kúnde esh sımptom baıqalmasa, naýqastyń jaı-kúıi jaqsy bolsa, ony baqylaýdan alamyz. Odan keıin PTR testileý nemese ózge de tekserý mindetti emes», - dedi A. Tabyldına.