Koronavırýstan úıden emdelý hattamasyna bes tegin dári engizildi – DSM

NUR-SULTAN. QazAqparat – KVI-den úı jáne ambýlatorııalyq deńgeıde emdeý hattamasyna tegin bes farmatsevtıkalyq preparat engizildi. Bul týraly Densaýlyq saqtaý mınıstri Alekseı Tsoı OKQ-da ótken baspasóz máslıhatynda málim etti, dep habarlaıdy QazAqparat tilshisi.

«Pnevmonııany, koronavırýsty pnevmonııany, KVI-di úı jáne ambýlatorııalyq deńgeıde emdeý hattamasyna tegin bes farmatsevtıkalyq preparat engizý máselesin qarastyryp jatyrmyz», - dedi Alekseı Tsoı.

Mınıstr atap ótkendeı, adamdar naryqta osy preparattardy izdep ketpeý úshin qolǵa alynyp otyrǵanyn jetkizdi.

«Qazir qajetti protsedýralar júrgizilip jatyr. Emdeý hattamalary engizilýde. Patsıentter aýrýhanaǵa jetpeı jatyp, emdi úıinde ala alatyndaı, ıaǵnı prepaparatty úıine jetkizý máselesin pysyqtaýdamyz», - dedi ol.

Naqtyraq aıtqanda ambýlatorııalyq dári-dármekpen qamtý tizimine ystyq túsiretin preparattardan «Paratsetamol» men «Ibýprofendi», antıkoagýlıanttardan «Rıvaroksaban», «Apıksaban» men «Dabıgotrandy» engizý kózdelgen.

«Bólshektik saýda úshin biz Reseı men Úndistannan 6 áýe reısin oryndap, Qazaqstanǵa 4 mln qaptama dári jetkizildi. Odan bólek árbir aımaq ózdigimen bul jumysty júrgizýde», - dedi Alekseı Tsoı.