Koronavırýstan qaı sanattaǵy adamdar jıi kóz jumady

ALMATY. QazAqparat - Koronavırýs ınfektsııasy asqynǵan derti bar adamdarǵa óte qaýipti. Bul týraly Almatydaǵy №36 qalalyq emhananyń jalpy tájirıbelik dárigeri Móldir Álimbaeva aıtty, dep habarlaıdy QazAqparat tilshisi.

Ǵalymdar koronavırýs 80 jastan asqan kisiler úshin óte qaýpiti ekenin anyqtady. Bul jas tobyndaǵy ólim kórsetkishi 14,8% quraıdy.

Dáriger Móldir Álimbaevanyń aıtýynsha, koronavırýs adam aǵzasyna ártúrli áser etedi. Alaıda qart adamdar men sozylmaly aýrýlary bar naýqastar úlken qaýip tóndiredi. Olar koronavırýs kezinde negizgi qaýip toptaryn quraıdy jáne ınfektsııany qıyndatady. Ólim-jitim jıi bolady.

«Qant dıabeti, tynys alý joldarynyń aýrýlary, júrek-qan tamyrlary aýrýlary jáne gıpertonııa – koronavırýs boıynsha negizgi qaýip toby. Sondaı-aq, juqtyrǵandardyń jasy neǵurlym úlken bolsa, ólim qaýpi soǵurlym joǵary bolady: 70 pen 79 jas aralyǵynda 8%, 60-tan 69 jasqa deıin - 3,6%», - deıdi dáriger.

Spıkerdiń sózinshe, aýrýhanaishilik ınfektsııalar da naýqastyń jaǵdaıyn nasharlatýy múmkin.

«Eger olar antıbıotıkterge tózimdi bolsa, tıimdi antıbıotıkterdi tańdaý úshin ýaqyt qajet. Al bul ýaqytta adamnyń jaǵdaıy kúrt nasharlap, ólimmen aıaqtalýy múmkin», - dedi ol.

Qant dıabeti, semizdik jáne júrek aýrýynan basqa, koronavırýs ókpeniń sozylmaly aýrýlary úshin de qaýipti.

«Koronavırýs qant dıabeti nemese júrek aýrýyn ǵana emes, jalpy sozylmaly aýrýlardy kúsheıtedi. Árıne, ókpege baılanysty problemalary bar adamdar táýekelge ushyraıdy. Bronh demikpesi, sozylmaly obstrýktıvti ókpe aýrýy barlarǵa keri áser etedi», - dep qorytyndylady Móldir Álimbaeva.