Koronavırýstan álem ekonomıkasyna keletin shyǵyn $8,8 trln-ǵa jetýi múmkin

NUR-SULTAN. QazAqparat – Koronavırýs saldarynan álem ekonomıkasyna keletin shyǵyn $5,8 trln-nan $8,8-ǵa deıin kóbeıýi múmkin. Mundaı boljam Azııa damý bankiniń saıtynda jarııalandy.

Boljam boıynsha, eger shekteý jarty jylǵa sozylatyn bolsa shyǵyn $8,8 trln-dy quramaq, al $5,8 trln - úsh aıdyń ishinde ekonomıka qalpyna kelmegen jaǵdaıda.

Sáýirdegi baǵalaýmen salystyrǵanda bank boljamy nasharlady – buryn sarapshylardyń esepteýinshe álem ekonomıkasy $2-4,1 trln aralyǵynda zardap shegýi múmkin edi.

Azııa bankiniń aıtýynsha, koronavırýs paıda bolyp, keń taraǵan jáne qatań shekteýler qoıylǵandyqtan ishki suranysy birden tómendegen elderdiń ekonomıkasy kóbirek zardap shegedi. Oǵan qosa, ekonomıkasy ashyq memleketter men týrızmge táýeldi elder shyǵynǵa batady.

Sarapshylardyń atap ótýinshe, ekonomıkalyq shyǵyndy azaıtýdyń kilti – pandemııa tártibine baǵyný, ıaǵnı testileý, oqshaýlaý jáne áleýmettik qashyqtyqty saqtaý. Oǵan qosa úkimet pandemııanyń jaǵymsyz áserin azaıtý úshin muqtaj otbasylar men mekemelerge kómek kórsetýi kerek.

ADB taldaýy pandemııaǵa naqty sharalar qoldaný koronavırýstyń jahandyq áserin azaıtatynyn kórsetti.