Koronavırýspen baılanysty aqýyz qan tamyrlaryn qorǵaıtyny anyqtaldy

ASTANA. KAZINFORM — SARS-CoV-2 vırýsy adam jasýshalaryna ený úshin paıdalanatyn ACE2 aqýyzy gıpertonııa men ekinshi tıpti qant dıabeti kezinde qorǵanysh ról atqarýy múmkin. Mundaı qorytyndyǵa Mayo Clinic ǵalymdary keldi, dep habarlaıdy Report.

Zertteý Circulation: Genomic and Precision Medicine ǵylymı jýrnalynda jarııalanǵan.

Ǵalymdar brıtandyq bıobankke qatysqan adamdardan alynǵan 45 myńnan astam qan úlgisin taldaǵan. Zertteý barysynda júrek-qan tamyrlary aýrýlarymen baılanysty toǵyz aqýyzdyń, sonyń ishinde ACE2, BNP, NT-proBNP jáne troponın I deńgeıleri zertteldi.

Zertteýshilerdiń erekshe nazaryn ACE2 — angıotenzınge aınaldyratyn fermenttiń ekinshi tıpi aýdardy. Bul aqýyzdyń deńgeıi qan qysymy joǵary jáne dıabetke shaldyqqan adamdarda joǵary bolǵan. Atalǵan eki faktor júrek-qan tamyrlary aýrýlarynyń negizgi qaýip týdyratyn sebepteri sanalady. Áser, ásirese áıelder arasynda aıqynyraq baıqalyp, dıabetpen baılanysty genetıkalyq ereksheliktermen ushtasqan.

Mendeldik randomızatsııa ádisin qoldaný arqyly ǵalymdar ACE2 deńgeıiniń joǵary bolýy atalǵan aýrýlardy jaı ǵana qatar alyp júrmeı, kerisinshe gıpertonııa men dıabettiń damý qaýpin tómendetýi múmkin ekenin dáleldegen.

Bıologııalyq turǵydan bul ACE2 aqýyzynyń qyzmetimen túsindiriledi. Ol qan tamyrlaryn taryltatyn angıotenzın II molekýlasyn ydyratyp, tamyr qabyrǵasyn bosańsytatyn qosylystardyń túzilýine yqpal etedi. Sondyqtan gıpertonııa kezinde ACE2 deńgeıiniń artýy aǵzanyń qan qysymyn tómendetýge baǵyttalǵan ótemdik reaktsııasy bolýy yqtımal.

ACE2 kóbine koronavırýs jasýshaǵa enetin retseptor retinde belgili. Alaıda jańa derekter bul aqýyzdyń júrek-qan tamyrlary júıesin retteýdegi mańyzdy rólin kórsetip otyr. Zertteý avtorlarynyń pikirinshe, ACE2 bolashaqta perspektıvaly bıomarker ári emdik nysanaǵa aınalýy múmkin.

Aıta keteıik, Eýropada COVID-19 jáne tumaýǵa arnalǵan jalǵan test úlgileri anyqtaldy.