Koronavırýs: Teńiz kenishine jumysshylar jalǵan PTR anyqtamamen kelgen

ATYRAÝ. QazAqparat – Atyraý oblysyndaǵy Teńiz kenishine merdiger kompanııalardyń jumysshylary jalǵan PTR test anyqtamasymen kelgen, dep habarlaıdy QazAqparat.

Bul týraly óńirlik kommýnıkatsııalar qyzmetiniń alańynda ótken onlaın-brıfıngte «Teńizshevroıl» kompanııasynyń Úkimetpen jáne jurtshylyqpen baılanys bóliminiń bas menedjeri Rzabek Artyǵalıev málim etti.

«Merdiger mekemelerdiń keıbir qyzmetkerleri sanıtarlyq beketterden jalǵan PTR-test anyqtamalardy kórsetý arqyly ótken faktiler anyqtaldy. Osyndaı qyzmetkerlerge berilgen ruqsattar dereý joıyldy. Óreskel faktiler týraly tıisti memlekettik organdarǵa habarlandy. Resmı tergeý júrgiziledi dep kútilýde», - dedi Rzabek Artyǵalıev.

Eske sala ketsek, buǵan deıin Teńiz kenishinde bir táýlikte 42 jumysshy indet juqtyrǵanyn, ken ornynda 2 kompanııa karantınge jabylǵanyn jazǵan bolatynbyz.