Koronavırýs: Teńiz kenishinde 2 kompanııa karantınge jabyldy
Atyraý oblysynyń bas sanıtar dárigeri Amantaı Jumaǵalıevtyń málimetine sensek, Teńiz ken ornynda 7 jeltoqsannan bastap karantın sharalary kúsheıtilgen.
«Sońǵy eki aptada koronavırýs dereginiń 80% Teńiz ken ornynyń qyzmetkerlerinen anyqtaldy. Naýqastarmen baılanysta bolǵan jumysshylar oqshaýlanyp, medıtsınalyq kómek kórsetilip jatyr. Ótken bir táýlikte Teńiz ken ornyndaǵy eki kompanııanyń 42 jumysshysy koronavırýs ınfektsııasyn juqtyrdy. Naýqastardyń 99% profılaktıkalyq maqsatta júrgizilgen skrınıng nátıjesinde belgili bolyp otyr. Qazir eki kompanııa karantınge jabyldy», - deıdi Amantaı Jumaǵalıev.
Onyń aıtýynsha, Densaýlyq saqtaý mınıstrliginiń krıterıılerine sáıkes, eger Atyraý qalasy men basqa eldi mekenderde ınfektsııanyń ósýi baıqalsa, shekteýler kúsheıtilip, karantın jarııalanýy múmkin. Biraq, ázirge mundaı qajettilik týyndap otyrǵan joq.
Bas sanıtar dáriger óńir turǵyndary men qonaqtaryn, ásirese demalys jáne aldaǵy mereke kúnderi sanıtarlyq sharalardy qatań saqtaýǵa shaqyrdy.
«Aldaǵy demalys, merekelerge baılanysty, ásirese, jańa jyl kúnderi otbasylyq is-sharalardy ótkizbeý kerek. Maska rejımin, qoǵamdyq oryndarda áleýmettik qashyqtyqty saqtap, qoldy jıi jýǵan jón. Bul – talap», - dedi bas sanıtarlyq dáriger Amantaı Jumaǵalıev.
Eske sala ketelik, buǵan deıin Teńiz kenishinde bir táýlikte 42 jumysshynyń indet juqtyrǵanyn, atalǵan ken ornyndaǵy statsıonarǵa taǵy da 15 medıtsına qyzmetkeri baratynyn habarlaǵan edik.
