Koronavırýs ınfektsııasymen kúresýde aqmolalyqtardyń jetistigi
Osy rette, QazAqparat tilshisi aqmolalyqtardyń koronavırýs ınfektsııasynyń taralýynyń aldyn alý jáne boldyrmaý maqsatynda júzege asyrylyp jatqan ıgi isterine sholý jasaıdy.
Naýryz aıynda Kókshetaýdaǵy «Analar úıinde» turyp jatqan analar dákeden medıtsınalyq maska tige bastady.
«Ana úıi» úılestirýshisi kópbalaly ana Quralaı Jumabekovanyń aıtýynsha, bastapqyda dákeden medıtsınalyq maska tigýmen taǵdyr tálkegine túsken alty ana aınalysty.
«Maska tigemiz dep múlde oılaǵan joqpyz. Mektepte muǵalimder balalarymnan maska ákelýdi talap etti. Ol dárihanalarda bolmaǵan soń ózime qolmen tigýge týra keldi. Keıin suranys túse bastady. Osylaısha, Ana úıindegi alty ana jappaı tige bastady», - deıdi Quralaı Jumabekova.
Onyń aıtýynsha, alǵashqy kúnderi 600 maskany oblys ortalyǵyndaǵy áleýmettik mekemeler men jeke adamdar satyp alǵan.
«Maska tigýdi qolǵa almas buryn TJD-dan maskanyń standartyn aldyq. Alty qabat dákeden turatyn maskany birneshe ret qoldanýǵa bolady. Búgingi kúnge deıin qaladaǵy áleýmettik mekemeler men jeke adamdarǵa 600 maskany sattyq. Mundaǵy bir maskanyń quny 120 teńge. Taǵy 3 myń maskaǵa suranys tústi, áli de suranys túsýde. Ózimiz úlgermeıtin bolǵandyqtan, úıde bala kútýmen otyrǵan analardy jaldadyq. Budan bólek, dákeni qıyp kómektesip otyrýǵa 50 eriktini jaldadyq», - dep aıtqan bolatyn sol kezde Quralaı Jumabekova.
Onyń sózinshe, qoldan tigilgen maskany satyp alǵan adam ózin vırýstan qorǵap qana qoımaıdy, «Ana úıinde» turyp jatqan ana men balaǵa qoldaý kórsetip otyr.
Aıta keteıik, Kókshetaý qalasynda turatyn «Kúmis alqa» ıegeri Quralaı Jumabekova týǵan balalaryna ǵana emes, ózgeniń balalaryna da jeterlikteı analyq mahabbatqa toly úlken júrek ıesi. Alty balany dúnıege ákelip, taǵy bes balany baýyryna basqan ol qoǵamdyq jumystarǵa da belsendi aralasýda.
Іndet órshı bastaǵan kezde, aqmolalyq kásipker demalys ortalyǵyn koronavırýske shaldyqqandardy emdeıtin gospıtal retinde berdi. Aqmola oblystyq densaýlyq saqtaý basqarmasynyń basshysy Súlen Іlıasov kásipker usynyp otyrǵan demalys ortalyǵy Zerendi aýdandyq aýrýhanasyna bekitiletin aıtty.
«Qazirgi kezde bizdiń taraptan qajetti dárigerler men orta medıtsınalyq personaldardyń sany eseptelýde. Eger jetispeı jatsa, Kókshetaý jáne Sandyqtaý aýdandarynan mamandar aldyrtamyz. Bul biz úshin kómek, osy arqyly dárigerlerimiz azamattarymyzdy emdep, ómirine arasha túsetin bolady», - dep aıtqan bolatyn basqarma basshysy.
Sonymen qatar, Súlen Іlıasov tamaqpen qamtamasyz etý máselesin QR Densaýlyq saqtaý mınıstrligi óz moınyna alatynyn aıtty. Óz kezeginde «Aurora Garden» demalys ortalyǵy naýqastardy karantınge jáne gospıtalge jatqyzý úshin qajetti jaǵdaıdy usyndy.
Arman Shoraev telefon arqyly onyń mundaı ıgi qadamǵa barýyna otbasynyń ortaq tilegi arqaý bolǵanyn aıtty.
«Biz tegin 100 oryndyq demalys ornyn berý arqyly osy indetpen kúresýge óz úlesimizdi qosqymyz keledi», - dedi kásipker.
Bul týraly Arman Shorav óziniń Facebook paraqshasynda da jazdy. Ol óz jazbasynda usynysy qoldaý tapqandyǵy úshin qýanyshty ekenin jetkizdi. Jeli qoldanýshylar kásipkerdiń ıgi isine qoldaý bildirip, alǵys bildirýde.
Naýryz aıynda Kókshetaýdaǵy irgeli kásiporyn – «Tynys» aktsıonerlik qoǵamy koronavırýs ınfektsııasymen kúreste aýadaı qajet qazirgi zamanǵy «Kókshetaý 4P» jasandy tynys alý apparatyn shyǵarýdy qolǵa aldy.
Zaýyt basshylyǵynyń málimetinshe, zaýytta qazirgi zamanǵy «Kókshetaý 4P» ókpeni jasandy jeldetý apparatynyń 800 danasy shyǵarylypty. Ókpeni ottegi-aýa qospasymen jasandy jeldetýge arnalǵan apparat jedel járdem kólikterinde, oqıǵa ornynda, hırýrgııa bólimderinde, jansaqtaý jáne ıntensıvti terapııada qoldanylyp keledi. Kúz aılarynda respýblıka boıynsha oblystarǵa osyndaı apparattyń 500-den astam danasy jóneltilgen eken.
Aqmola oblysy boıynsha 60 jasandy jeldetý apparaty jetkizildi, olardyń ishinde 17 apparat oblystyq densaýlyq saqtaý basqarmasyna qaıyrymdylyq kómek retinde tabys etildi. Zaýytta jasandy tynys alý apparattary jańartylyp, negizgi jınaqtaýshy komplektileri ázirlenýde. Zaýytqa áli de medıtsınalyq mekemeler men jeke tulǵalardan tapsyrystar túsýde.
«Jasandy tynys alý apparattary jańartylyp, negizgi jınaqtaýshy komplektileri ázirlenýde. Sondaı-aq kásiporynda 200 daıyn komplektiler bar. Zaýytqa áli de medıtsınalyq mekemeler men jeke tulǵalardan tapsyrystar túsýde», - dep atap ótken edi sol kezde qala ákimdigindegiler.
Aıta keteıik, sońǵy kezderi zaýytta negizgi jumystardan bólek, koronavırýs ınfektsııasymen kúresý úshin qajetti «Kókshetaý 4P» jasandy tynys alý apparaty, medıtsınalyq maska, qorǵanys kıimderi shyǵarylyp jatyr.
Sonymen qatar, Aqmola oblysynda qolǵa arnalǵan antıseptık shyǵaryla bastady. Kókshetaý qalasyndaǵy «Turmystyq hımııa zaýyty» jaýapkershiligi seriktestiginiń ekologııalyq taza ónimine jurttyń suranysy joǵary. Zaýytta Qazaqstannyń soltústik óńirlerine turmystyq hımııalyq zattarynyń birneshe túri shyǵarylady.
«Bizdiń zaýyt qysqa merzim ishinde bakterııaǵa qarsy jáne qolǵa arnalǵan antıseptık shyǵarýǵa beıimdelip, óndiristi iske qosty. «Esil» áleýmettik kásipkerlik korporatsııasy UK» AQ Basqarmasymen 15 myń lıtr antıseptıkalyq ónimge kelisimshart jasaldy. Óndiris tolyq qýatymen jumys isteýde», - deıdi zaýyt basshysy Farýk Qurmaev.
Kásiporyn basshysynyń aıtýynsha, qolǵa arnalǵan antıseptıktiń quramynda dezınfektsııa jasaıtyn kontsentrat, jergilikti Aıdabol spırti, glıtseron, ıistendirgish jáne spetsıfıkalyq qospa bar. Kásiporyn aıyna 60 myń lıtr ónim shyǵarady. 1,5 lıtr jáne 220 mıllılıtrlik qutyǵa quıylǵan antıseptıktiń bir lıtri 1500 teńge turady. Bul óńirdegi eń arzan qolǵa arnalǵan antıseptık.
Shildeniń 24-de Aqmola oblysyndaǵy aýrýhanalarǵa birden barlyq patsıentke ottegi bere alatyn qondyrǵy ornatylatyny belgili boldy. Ottegi beretin eki stansany ornatý úshin jetkizýshilermen kelisimshart jasalǵan. Olardyń biri – Q.Qurmanbaev atyndaǵy Aqmola oblystyq ftızıopýlmonologııa ortalyǵyna, al ekinshisi – Arshaly aýdandyq aýrýhanasyna ornatylady. Osyndaı arnaıy júıe kópsalaly oblystyq aýrýhananyń provızorlyq statsıonarynda da uıymdastyrylady. Teri-venerologııa dıspanserinde ashylǵan Kópsalaly oblystyq aýrýhananyń provızorlyq statsıonarynda ottegimen jabdyqtaý júıesin jaqsartý josparlanǵan. Ázirge munda ottegi ballondarynan quralǵan qondyrǵy jumys istep jatyr.
«Endi ylǵal gaz patsıentke qubyrlar arqyly barady. Oblys ákiminiń qoldaýymen qondyrǵyny jańartý jáne aýrýhanany ottegimen jabdyqtaýǵa qosymsha qarajat bólingen», – dep baıandady KOA bas dárigeri Nurlan Jarov.
Budan basqa, oblystyq densaýlyq saqtaý basqarmasy aldaǵy ýaqytta 15 ókpeni jasandy jeldetý apparaty, 1 myń pýlsoksımetr, 100 ottegi kontsentratory jáne 50 ottegi ballonyn satyp alady, olardyń barlyǵy óńirdegi aýrýhanalarǵa taratylady.
Aıta keteıik, medıtsınalyq mekemelerge qaıyrymdylyq qorlar men metsenattardyń qarajatyna satyp alynǵan jabdyqtar áli de jetkizilip jatyr. Búginde aýrýhana, statsıonar men emhanalarǵa demeýshilerdiń qarajaty esebinen júzden astam ottegi kontsentratory, 500 ottegi ballony jetkizilipti.
Qarasha aıynda Kókshetaýda koronavırýsqa shaldyqqan naýqastar emdeletin zamanýı úlgidegi juqpaly aýrýlar ortalyǵy ashyldy. Kókshetaýdyń irgesinde jańadan salynǵan oblystyq juqpaly aýrýlar ortalyǵy 200 kereýetke arnalǵan. Munda Germanııa jáne Reseıden jetkizilgen qazirgi zamańǵy jabdyqtar ornatylǵan.
Segiz korpýstan turatyn nysanda jylytý qazandyǵy, kólikterdi dızenfektsııalaý pýnkti, medıtsınalyq qaldyqtardy zalalsyzdandyrý orny, 20 oryndyq jansaqtaý bólimshesi jáne ár palatada bir ortalyqtandyrylǵan ottegi stansasy bar.
Sonymen qatar, «Fılıps» kompıýterli tomografy, «H-FIT» rentgen apparaty, ókpeni jeldetkish 4 apparat, tórt naýqas monıtory, «LOGIQ 9E» ýltra dybysty dıagnostıka apparaty, elektrokardıograf apparaty ornatylǵan.
Qurylys jumysyn merdiger «Bi Group» kompanııasy júrgizgen. Jobanyń quny 7 mıllıard 185 mıllıon teńgeden asady. Jalpy aýmaǵy 4,4 gektardy quraıtyn nysan qurylysyna 620 adam tartylyp, úsh aýysymmen jumys istep, eki aıdyń ishinde aıaqtaǵan.
«Memleket basshysynyń tapsyrmasy boıynsha 200 kerýettik juqpaly aýrýlar ortalyǵyn ashtyq. - Bul qazirgi zamanǵa saı jabdyqtalǵan medıtsınalyq mekeme. Nysan pandemııa kezinde ǵana emes, odan basqa ýaqytta da halyqtyń densaýlyǵy úshin barynsha jumys isteýi tıis, – degen edi oblys ákimi Ermek Marjyqpaev.
Aıta keteıik, mundaı ortalyq elimizdiń Nur-Sultan, Almaty, Shymkent qalalarynda ǵana bar. Qurylys jumystaryn merdiger «Bi Group» kompanııasy júrgizgen. Jobanyń quny 7 mıllıard 185 mıllıon teńgeden asady. Aýmaǵy 4,4 gektardy quraıtyn nysan qurylysyna 620 adam tartylyp, úsh aýysymmen jumys istep, eki aıdyń ishinde aıaqtaǵan.
Jalpy, koronavırýs ınfektsııasymen kúresýde aqmolalyqtardyń jetistigi mol. Oblysta karantın talaptaryn qataıtý arqyly indettiń taralýyna jol berilmedi. Qazirgi kezde, oblysta koronavırýske qatysty jaǵdaı turaqtalǵan.