Koronavırýs: Grýzııanyń 7 qalasynda shekteý sharalary engizildi
9 qarashadan bastap Tbılısı, Kýtaısı, Batýmı, Rýstavı, Zýgdıdı, Gorı, Potı qalalarynda kólik pen jaıaý júrginshilerdiń qozǵalysyna 22:00-den 05:00-ge deıin shekteý qoıylady.
Bul shekteý halyqaralyq júk tasymaldaryna, Medıtsınalyq jáne farmatsevtıkalyq qyzmetterdiń, strategııalyq nysandar men BAQ ókilderin, sondaı-aq jetkizý qyzmetiniń kýrerlerin qosa alǵanda, júrip-turýy qyzmettik mindetterdi oryndaý úshin asa mańyzdy bolyp tabylatyn adamdar men kólik quraldaryna qoldanylmaıdy. Degenmen, aldymen olar muny jedel shtabpen kelisýi kerek.
Grýzııa Úkimeti mundaı shara komendanttyq saǵat emes, taǵy bir naqty shekteý dep sanaıdy.
Sonymen qatar, medıtsınalyq, farmatsevtıkalyq, strategııalyq nysandardan basqa barlyq uıym 22:00-ge deıin jumys isteıdi.
Atalǵan qalalardaǵy memlekettik jáne jekemenshik barlyq balabaqsha 9 qarashadan bastap belgisiz merzimge jabylady.
Grýzııanyń osy jeti qalasynda avtobýstar men shaǵyn avtobýstardaǵy jolaýshylar sanyna shekteýler qoıylady. Buǵan deıin vıtse-premer, Grýzııanyń Óńirlik damý mınıstrliginiń basshysy Maııa Tskıtıshvılı túsindirgendeı, qoǵamdyq kólikte turyp turýǵa tyıym salyndy.
Grýzııadaǵy epıdemıologııalyq ahýal kúzdiń basynan bastap nasharlaýda. 10 qyrkúıekte eldiń premer-mınıstr Georgıı Gaharııa koronavırýstyń ekinshi tolqynynyń bastalǵany týraly málimdegen bolatyn. Premer-mınıstr bılik aýrýdyń taralý jaǵdaıyn tolyq baqylaýǵa alatynyna sendirdi. Sol kezde elde 24 saǵat ishinde vırýs juqtyrǵandardyń rekordtyq sany anyqtalǵan bolatyn. 57 adam koronavıýrýs juqtyrǵan edi.
4 qarashada aýrýǵa shaldyqqandardyń táýliktik ósimi 2 myńnan asty. 8 qarashada ol 2 901, al koronavırýs juqtyrǵandardyń jalpy sany 57 753 boldy.
Tek 31 qazanda parlament saılaýyn ótkizgennen keıin ǵana bılik jańa shekteýlerdi engizýdi sheshti.
Jekeleı alǵanda 4 qarashadan bastap jabyq ǵımarattarda da, kóshelerde de maska taǵýdy mindettegen bolatyn. 25 qarashaǵa deıin eldiń barlyq iri qalasynda oqý protsesi qashyqtan bolatyn boldy. Sondaı-aq Grýzııanyń barlyq meıramhanalary men kóńil kóterý ngysandaryna túngi ýaqytta 22:00-den keıin jumys isteýge tyıym salyndy.
