Koronavırýs boıynsha álemdegi jaǵdaı
Djons Hopkıns ýnıversıteti saıtyndaǵy 28 aqpan saǵat 11.22-degi málimetke sáıkes, álem boıynsha koronavırýs barlyǵy 113 mln 784 myń 735 adamnan anyqtaldy. Onyń ishinde qaıtys boldy – 2 mln 525 myń 401 naýqas.
Ókilder palatasy Baıdenniń daǵdarysqa qarsy sharalaryn qoldady
AQSh Kongresiniń Ókilder palatasy Djo Baıden ákimshiligi ázirlegen daǵdarysqa qarsy is-sharalar paketin maquldady. Aqúı bul sharalar pandemııa jaǵdaıynda ekonomıkanyń jandanýyna septigin tıgizetinine úmit artýda.
Jobany Djo Baıden qańtar aıynda usynǵan bolatyn. Onyń ishinde sondaı-aq Amerıka azamattaryna 1,4 myń dollardan tólem jasaý kózdelgen. Budan bólek, Baıden koronavırýs ınfektsııasyn anyqtaý testinen ótý úshin 50 mlrd dollar qarjy bólýdi usyndy, taǵy 20 mlrd dollar vaktsınalaý baǵdarlamasyna jumsaý josparlanǵan. Kómek paketiniń jalpy kólemi 1,9 trıllıon dollardy qurap otyr. Bul, eldiń jalpy ishki óniminiń shamamen 10 paıyzy.
Qoldaý sharalarynyń paketin barlyq derlik demokrattar (eki ókilinen basqa) qoldady. Usynylǵan paketti qymbat dep sanap otyrǵan respýblıkalyqtar oǵan qarsy daýys bergen.
Sharalar paketinde sondaı-aq jumyssyzdyq deńgeıiniń ósýi jaǵdaıynda 1 mıllıon jańa jumys ornyn qurý, eńbekten aıyrylǵandarǵa kómek kórsetý qarastyrylǵan.
Sońǵy sóz Senatta. Buǵan deıin ol Djo Baıden josparynyń keı bóligin qoldaǵan joq edi: jobadan eńbek tólemin eki ese – saǵatyna 7,5 dollardan 15 dollarǵa deıin kóbeıtýdi qarastyratyn bólim alynyp tastaldy.
Frantsııa men Jańa Zelandııada lokdaýn engizildi
Frantsııanyń eki qalasy – Nıtstsa men Dıýnkerkte aýrýǵa shaldyqqan adamdar sanynyń ósimine baılanysty lokdaýn engizildi. Eldiń densaýlyq saqtaý mınıstri Olıve Veran buǵan deıin Dıýnkerkte osy aptada aýrýǵa shaldyqqan adamdardyń sany qalanyń árbir 100 myńyna shaqqanda 100-ge deıin óskenin habarlady. Bul, el boıynsha ortasha mánnen toǵyz ese kóp bolyp tur.
Frantsııanyń premer-mınıstri Jan Kastekstiń eskertýinshe, osyndaı sharalar koronavırýs ınfektsııasyn juqtyrý oqıǵalarynyń ósimi baıqalyp otyrǵan taǵy 20 eldi mekende engizilýi múmkin.
Jańa Zelandııanyń eń iri qalasy Oklendte bılik vırýs juqtyrý oqıǵalarynyń artýyna baılanysty kem degende bir aptaǵa lokdaýn engizgen.
Jeksenbi tańynan bastap Oklendte turatyn 1,7 mln adam úılerinde qalyp, tek jumysqa ne azyq-túlik satyp alýǵa shyǵýy tıis. Qalaǵa kirýge jáne odan shyǵýǵa shekteý qoıyldy.
Qaladaǵy mektepter men birinshi qajettiliktegi taýarlardy satpaıtyn dúkender jabylady.
Jańa Zelandııa koronavırýs ınfektsııasynyń keńinen taralýynan aman qaldy. Pandemııa bastalǵaly 5 mln halqy bar elde Covid-19 vırýsynan 26 adam qaıtys bolǵan.
Chehııada jańa shekteýler. Portýgalııa Brıtanııamen áýe qatynasyna salynǵan tyıymdy uzartty.
Chehııa bıligi ınfektsııanyń taralýyna jol bermeý úshin jańa shekteýler engizdi. Olar 1 naýryzdan bastap qoldanylady. Úkimet josparyna sáıkes, bastaýysh mektepter qashyqtan oqytý formatyna aýysady. Buǵan deıin joǵary jáne orta synyp oqýshylary úshin mektepte sabaq oqytý toqtatylǵan edi.
Portýgalııa koronavırýs ınfektsııasynyń jańa shtamdarynyń taralýyna jol bermeý maqsatynda Brazılııa jáne Brıtanııamen áýe qatynasyna salynǵan tyıymdy naýryzdyń ortasyna deıin uzartty.
Sondaı-aq buǵan deıin habarlaǵanymyzdaı, Amerıka Johnson & Johnson kompanııasy óndirgen koronavırýsqa qarsy bir komponentti vaktsınany qoldanýǵa ruqsat berdi. Vaktsınanyń alǵashqy partııasy 1 naýryz kúni jetkiziledi dep kútilýde.
