Koronavırýs: BQO-da ambýlatorlyq em alyp jatqan naýqastar sany 68,4 paıyzǵa tómendedi

ORAL. QazAqparat – Batys Qazaqstan oblysynda koronavırýs juqtyrǵan 147 naýqas ambýlatorlyq em alyp jatyr, dep habarlaıdy QazAqparat tilshisi.

BQO densaýlyq saqtaý basqarmasynyń basshysy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 85-i nemese 57,8 paıyzy Oral qalasynda tirkelgen.

Onyń aıtýynsha, ótken aptamen salystyrǵanda, ambýlatorlyq naýqastar sany 68,4 paıyzǵa tómendedi.

Sondaı-aq 14 ınfektsııalyq statsıonarda 70 naýqas bar, bul ótken aptamen salystyrǵanda, 59,8 paıyzǵa az. Statsıonarlar 9,3 paıyzǵa tolǵan.

Jansaqtaý bólimshesinde jatqan 14 naýqastyń 13-i nemese 93 paıyzy ekpe almaǵan. Bulardyń bireýi – 65-ke deıin, 13-i – 65 jastan, sonyń ishinde altaýy – 80-nen asqandar. 9 naýqas aýyr, beseýi asa aýyr halde. Invazıvti jasandy tynys alý apparatyna 5, ınvazıvti emes osyndaı qurylǵyǵa 7, ottegi kózine 2 naýqas qosylǵan.

«KVI-men aýyryp, statsıonarlyq em alǵan adamdar kórsetkishteri boıynsha ońaltý emin alýyna bolady. Ońaltý qalalyq kópbeıindi aýrýhana, Jańaqala aýdanaralyq saýyqtyrý ortalyǵy jáne medıtsınalyq-sanıtarlyq alǵashqy kómek uıymdarynda júrgiziledi. Aýyrlyq deńgeıin jáne sozylmaly syrqattaryn eskere otyryp, ár naýqasqa jekeleı saýyqtyrý jospary jasalady. Ońaltýǵa tynys alý gımnastıkasy, drenajdy massaj, fızıoemdeý kiredi. Ońaltý kýrsy 7-10 kúnge eseptelgen», dedi A.Qalıbekov.

Eske sala keteıik, budan buryn Batys Qazaqstanda sońǵy aptada 8 adamnyń koronavırýstan kóz jumǵanyn jazǵan bolatynbyz.