Kórnekti jazýshy Dúkenbaı Dosjan dúnıeden ozdy
Dúkenbaı Dosjan 1942 jyly 9 qyrkúıekte Qyzylorda oblysy, Jańaqorǵan aýdany, Qulanshy aýylynda dúnıege kelgen.
1959-1964 jyldary S.M.Kırov atyndaǵy QazMÝ-di úzdik bitirip, 1963-1966 jyldary Almaty oblystyq «Jetisý» gazetiniń ádebı qyzmetkeri bolyp qyzmet etedi.
1966-1975 jyldary Almatydaǵy memlekettik «Jazýshy» baspasynda, 1976-1984 jyldary Qazaq SSR Baspa komıtetinde aǵa redaktor, bólim meńgerýshisi qyzmetterin atqarǵan.
1984-1991 jyldary Qazaqstan Jazýshylar Odaǵynyń ádebı keńesshisi, al 1992-1994 jyldary «Jalyn» jýrnalynda proza redaktory; 1994-1996 jyldary QR Avtorlyq jáne aralas quqyqtar jónindegi agenttiktiń bólim basshysy bolady.
1996-2002 jyldary QR Ulttyq bank murajaıynyń dırektory bolyp istedi. 2002 jyldan Prezıdenttik mádenıet ortalyǵynda - «Mádenı mura», «Kýltýrnoe nasledıe» jýrnalynyń Bas redaktory bolady.
Memlekettik syılyqtyń (1996), M.Áýezov atyndaǵy Ulttyq syılyqtyń laýreaty (1987), Túrkistan qalasynyń, ári birneshe aýdannyń Qurmetti azamaty, Qurmet (2001), Parasat (2008) ordenderiniń ıegeri.
Alǵashqy áńgimesi 15 jasynda jaryq kórgen qalamgerdiń kitaptary álemniń 20 tiline aýdarylyp, jalpy kólemi 3,7 mıllıon taralymmen basylyp shyqqan. Kitap palatasynyń Qazaqstandaǵy «Oqyrmany qısapsyz jazýshy» kýáligin alǵan. Onyń qalamynan 11 roman, 23 hıkaıat, 100-diń ústinde áńgime týdy.
Kún saıyn qalamǵa júginý minezine aınalǵan Dúkenbaı Dosjan «Otyrar», «Farabı», «Jibek joly» (1965-1966) shyǵarmalary arqyly «Tarıhı taqyryptyń pıoneri» atandy.
«Ál-Farabı» hıkaıaty ǵulama babanyń ómirin ózek etken. Hıkaıat kezinde orys, nemis, madııar, aǵylshyn, mońǵol, ýkraın, túrik tilderine aýdarylyp, jeke jınaq bolyp basylyp shyqty.
«Jibek joly» romany - tarıhı kórkem pálsapalyq shyǵarma. Orys, ýkraın, nemis, madııar, mońǵol, aǵylshyn, pushtyn tilderine aýdarylyp, jeke kitap bolyp shyqty. Kitap jelisi boıynsha Ardaq Ámirqulov «Otyrardyń kúıreýi» atty eki bólimdi kórkem fılm túsirdi.
Ulttyq qaýipsizdik komıtetiniń alpys jyldaı jabýly arhıvine alǵash engen Dúkenbaı Dosjan sot qujattary jelisimen «Abaqty» (1992) dereknama kitabyn jáne 1986 jylǵy jeltoqsan qyrǵynynyń izimen kórkemdelgen «Alań» (1993) romanyn jazdy.
1990 jyly D. Dosjannyń 2 tomdyq tańdamaly shyǵarmalary aqıyq aqyn Oljas Súleımenovtiń alǵysózimen, memlekettik tapsyryspen «Jazýshy» baspasynan jaryq kórdi.
2002 jyly «Bilim» baspasy oblystyq kitaphanalardyń suranysymen - metsenattar kómegimen - jazýshynyń 13 tomdyq tańdamaly shyǵarmalaryn basyp shyǵardy. On úsh tomdyqtyń alǵysózin kórnekti synshy Zeınolla Serikqalıev jazǵan. Qoljazbany tutastaı qaıta redaktsııalaý, qalyptaý, túsinikteme, baspalyq apparatyn túzýdi jazýshy Jarylqasyn Nusqabaev oryndap shyqty. Jazýshynyń atalmysh shyǵarmalary aǵylshyn, orys, japon, qytaı, shved, cheh, madııar, mońǵol, ýkraın, pushtyn tilinderine aýdarylyp basyldy.
Sońǵy jyldary jazýshynyń «Úsh taǵdyr» (2005), «Balalyqpen tildesý», «Dıolog s detstvom» (2005, 1-2 tom), «Jan tátti» (2006, hıkaıattar), «Jazmyshtyń formýlasy» (2008, jeti hıkaıat), «Abaıdyń rýhy» (2008, ǵumyrnamalyq-oıtolǵaý) kitaptary jaryq kórdi.
Astanadaǵy «Folıant» baspasy taqaýda ashqan «Oqyrmany qısapsyz jazýshy» aıdarymen «Terezeniń jaryǵy» (2009) jáne oryssha «Samyı chıtaemyı pısatel» aıdarymen «Kogda ıa ýmıral» (2009) kitaptary A.Kım men G.Belgerdiń aýdarmasymen kóp taralymmen oqyrmandar qolyna tıdi.