Qorǵastan 200 000-nan astam kólik kedendik rásimdeýden ótti - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Vızasyz rejım iske qosylǵaly beri Qazaqstanǵa kirip-shyǵatyndar sany artty - ukilialtay
Qytaı men Qazaqstan arasyndaǵy ózara vızalyq jeńildik 30 kúnge resmı túrde kúshine engeni belgili. Qazirgi ýaqytta Jemeneı keden beketinen (bergi jaǵy Maıqapshaǵaı keden beketi – avt.) kirip-shyǵatyn jolaýshylardyń ortasha táýliktik sany 300-den asady. Bul týraly Qytaıdyń ukilialtay aqparattyq portaly habarlaıdy.
Jalpy Qytaı men Qazaqstan arasynda kadrlyq saparlary, ekonomıkalyq jáne saýda almasýlary jıi bolyp turady. Qytaılyq keden beketi josparlaýdy kúsheıtý jáne polıtsııa kúshterin muqııat ornalastyrý arqyly jumysty ǵylymı túrde uıymdastyrǵanyn jáne barlyq tekserý arnalaryn ashqanyn aıtady.
Jemeneı shekaralyq baqylaý beketiniń birinshi kezekshi kapıtanynyń orynbasary Chen Rýıchı kedendik resimdeý protsedýralaryn ońtaılandyrý, tıimdi jáne yńǵaıly etý úshin jumys istep jatqanyn tilge tıek etedi.
«Qytaı men Qazaqstan arasyndaǵy 30 kúndik vızasyz rejım 10 qarashada júzege asyrylǵaly beri keden beketinen kirip-shyǵatyn jolaýshylar sany artty. Kún saıyn 300-den astam adam kirip-shyǵatyn tikeleı ósý tendentsııasyna ıe boldy. Biz jolaýshylardyń kirip-shyǵý úshin qaýipsiz, tıimdi jáne yńǵaıly kedendik resimdeý ortasyn qamtamasyz etýdi jalǵastyramyz. Kedendik resimdeý protsedýralaryn ońtaılandyrýda qyzmettik basshylyqty kúsheıtý sııaqty sharalardy qabyldaý arqyly jolaýshylarǵa jáne kedendik resimdeýdiń tıimdiligin únemi arttyrýǵa múmkindik beremiz», - deıdi Chen Rýıchı.
Álemge áıgili 1 000 kitap ózbek tiline aýdarylady - «ÓzA»
Ózbekstan Respýblıkasy Prezıdenti «Jastarǵa arnalǵan myń kitap» jobasyn júzege asyrý sharalary týraly sheshim qabyldady. Oǵan sáıkes álemge áıgili 1000 kitap iriktelip, ózbek tiline aýdarylady. Bul týraly osy aptada ózbekstandyq «ÓzA» aqparattyq agenttigi habarlady.
Joba aıasynda memlekettik tapsyrysqa sáıkes avtorlardan kitaptardy paıdalaný quqyǵyn satyp alý, olardy ózbek tiline aýdarý, baspaǵa daıyndaý jumystary júrgizilmek. Sonymen qatar memlekettik joǵary oqý oryndaryna arnalǵan kitaptardyń tizbesin Joǵary bilim, ǵylym jáne ınnovatsııalar mınıstrligi qalyptastyrady.
Kitaptar tizimin ǵylym, mádenıet, óner, ádebıet jáne basqa da salalarda tájirıbesi men bilimi jetilgen ǵalymdar, sondaı-aq Respýblıkalyq rýhanı-aǵartý ortalyǵynyń, Din isteri komıtetiniń mamandarynan quralǵan Sarapshylar keńesi jasaıdy.
Kitaptardy ózbek tiline aýdarý jáne basyp shyǵarýdy júzege asyrylý kezeńderi týraly sóz bolǵan. 2023-2024 jyldary alǵashqy 50 kitap aýdarylyp, daıyndalyp, basyp shyǵarylmaq.
Mońǵolııada Murat Pushataıuly atynda alaman aıtys ótti - Janadauir.com
Qurmanhan Muqamádıuly atyndaǵy mýzykalyq drama teatrynda aqyn, qoǵam qaıratkeri, saıasatker Murat Pushataıuly atynda alaman aıtys ótti. Atalmysh aıtysqa Qazaq elinen, Qytaı halyq respýblıkasynan, Qyrǵyz elinen jáne aımaǵymyzdan barlyǵy 21 aqyn qatysty, dep jazady mońǵolııalyq Janadauir.com saıty.
Atalǵan BAQ-tyń dereginshe, zal kórermenge lyq tolǵan. Halyqtyń osyndaı bir alaman aıtys saǵynyp qalǵany baıqalǵandaı. Aıtys bastalmas buryn aqyn jáne qoǵam qaıratkeri Murat Pushataıulyn eske alyp, ol kisiniń ómir jolynan málimetter berilip, óleńderi oqylyp, ánderi aıtylǵan. Áýelgi sóz kezegin alǵan bas tóreshi, aqyn, Qazaq eliniń mádenıet qaıratkeri Dáýletkereı Kápuly bul jolǵy aıtystyń mańyzdylyǵyna toqtalǵan.
Bul is-sharanyń barlyq shyǵynyn Murat Pushataıulynyń jubaıy men balalary kótergen.
Qazaqstan sheteldik ınvestorlardy tabysty túrde tartýda – «TRT»
Qazaqstan ekonomıkasyna sheteldik ınvestorlardy tabysty túrde tartyp jatyr. 2022 jyly Túrkııaǵa ınvestıtsııasy da 68 mıllıon dollardan asty. Qazaqstannan basqa elderdiń ekonomıkasyna júrgizilgen tikeleı ınvestıtsııa 10 jylda 52,2 paıyz azaıdy. 2022 jyly qazaq ınvestorlardyń eń kóp ınvestıtsııa salǵan úsh eli arasynda Nıderland, Reseı, Kaıman araldary oryn alady. Sonymen qatar Qazaqstan men Túrkııa arasyndaǵy saýda-ekonomıkalyq qatynastar bara-bara artýda. Bul týraly osy aptada Túrkııa Radıo Televızııa portaly habarlaǵan.
Atalǵan BAQ-tyń málimetinshe, Qazaqstan ekonomıkasyna tikeleı sheteldik ınvestıtsııalar bolsa 2013 jyly 24,1 mıllıard dollar bolatyn, bul kórsetkish on jylda 16,3 paıyz artyp, 2022 jyly 28,03 mıllıard dollardy quraǵan.
Ótken jyly qazaq ekonomıkasyna 8,3 mıllıard dollardyq ınvestıtsııa salǵan Nıderland sheteldik ınvestorlar tiziminde kósh bastap tur.
«Uly jibek joly-2023» atty halyqaralyq kórme bastaldy - «Parstoday»
Qazaqstannyń Almaty qalasynda túrli elder ókilderiniń qatysýymen «Uly jibek joly-2023» atty halyqaralyq kórme ótti. Bul týraly osy aptada «Parstoday» aqparat agenttigi QR Mádenıet mınıstrligine silteme jasap habarlady.
Keltirilgen málimetterge súıensek, bul kórmege Qazaqstan, Reseı, Qyrǵyz Respýblıkasy, Ózbekstan men Ázerbaıjannyń merzimdik basylymdary, baspalary men kitaphanalarynyń ókilderi, sondaı-aq Túrkııa, Qytaı men Irannyń dıplomatııalyq ókilderi jáne Qazaqstan Mádenıet mınıstrliginiń baspa isi basqarmasynyń qyzmetkerleri qatysqan.
Aıta ketý kerek, bul kórme Qazaqstanda zamanaýı kitaptardyń taralymyn arttyrý, kitap naryǵynda ishki óndirýshilerdiń ornyn nyǵaıtý jáne polıgrafııa salasynda jańa tehnologııalardy tanystyrý maqsatynda ótkizilip jatyr.
Sheshenniń tili, sheberdiń qoly ortaq - Janadauir.com
Osy aptada janadauir.com aqparattyq portaly «Kásibim-nesibem» aıdarynan on saýsaǵynan óner tamǵan sheber – Búrkithanqyzy Erkegúldi tanystyrdy. Ol Ólgıı sumyny 10-baqta ómirlik joldasy jáne balalarymen birge turady. Erkegúl qazir óz úıinde tigin tigýmen, jańa úılengen jastarǵa arnalǵan jasaýlar jasaýmen aınalysady. Mamandyǵy da – tiginshilik. Osy salada oqyp, kásiptiń qyr-syryn meńgergen sheber kóp jyldar boıy halyqqa qyzmet etip keledi. Óziniń súıikti isin, kásibi boldyra bilgen Erkegúl hanymdy mońǵolııalyq basylym áńgimege tartqan.
Tiginshi Erkegúl suhbat barysynda qazirgi tabysyn aıtyp bergen. Ol osyndaı qolóneri bar azamattar birigip seriktestik quryp, birge áreket etýine de bolady. Aryqaraı tipti kompanııa qurýǵa da múmkinshilikteri bar ekenin tilge tıek etken.
«Janadauir.com»-nyń dereginshe, Erkegúl turatyn aımaqtaǵy ulttyq qolóner degen óz aldyna úlken bir sala. Endeshe osyǵan da aımaq tarapynan qoldaýlar, baǵdarlamalar qajet ekeni aıtylady. Sondaı-aq osy kezde kóptegen qyz kelinshekti jumysty, kiristi boldyratyn múmkindikter qarastyrylýy kún tártibindegi másele bolyp tur, dep túıindeıdi mońǵolııalyq basylym.
Qorǵastan bıyl 200 000-nan astam kólik kedendik rásimdeýden ótti - «Halyq gazeti»
24 qarashadan bastap Qytaı-Qazaqstan shekarasyndaǵy Shyńjań Qorǵas avtomobıl porty 24 saǵattyq kedendik resimdeýdi jáne synaq negizinde júkterdi kedendik rásimdeýdi júrgizedi. Qorǵas shekarasy eldegi avtomobıl eksporty úshin eń úlken qurlyq porty. Myńdaǵan kommertsııalyq kólikter kún saıyn osynda kedendik rásimdeýden ótip, Ortalyq Azııa men Eýropaǵa satylady. Osy jyly portta 200 000-nan astam avtomobıl kedendik rásimdeýden ótti, dep habarlaıdy «Halyq gazeti».
Qytaılyq BAQ-tyń keltirgen málimetinshe, Qytaıǵa kiretin jáne shyǵatyn kólik quraldary negizinen eksportqa arnalǵan, aýyr jáne kommertsııalyq kólikterge bólinedi. Aýyr júk kólikteriniń ortasha táýliktik klırensi 300 birlikti quraıdy.
Bul kólikterdiń birazyna otandyq (Qytaılyq – avt.) jemister men kókónister, keıbireýlerine otandyq kúndelikti qoldanylatyn zattar, elektr buıymdary, sonymen birge Qytaıdyń «Bir beldeý, bir jol» boıyndaǵy elderdiń qurlysyna kómektesetin jel qalaqtary sııaqty jabdyqtar tıelgen.
Sondaı-aq osy aptada «Іlede qar-muz maýsymyna arnap 30-dan astam is-shara usynyldy» degen taqyryptaǵy aqparat jarııalanǵan bolatyn.
Bıylǵy 1 jeltoqsannan kelesi jyldyń 31 naýryzyna deıin Іle qazaq avtonomııaly oblysynyń barlyq aýdan-qalasy qatarynan 30-dan astam qar-muz festıvali, týrıstik is-sharalar uıymdastyryp, týrısterdi «qardan lázzat alýǵa, qar oınaýǵa jáne shańǵy tebýge» shaqyrady, dep jazady Qytaıdyń «Halyq» gazeti aqparattyq portaly.
Atalǵan basylymnyń málimetinshe, Іle oblysynda 20 taý shańǵysy kýrorty bar. Sonymen qatar Narat jáne Qarajon sııaqty joǵary sapaly kórkem jerler bar. Osy týrıstik resýrstardyń negizinde bıyl qysta saıahatshylardy tartý úshin 10 «hıt» oryn iske qosylady.
