Qorǵanys jáne aeroǵarysh mınıstrligi otandyq óndirýshiler memtapsyrystan shetteletinin joqqa shyǵardy
ASTANA. QazAqparat - QR Qorǵanys jáne aeroǵarysh mınıstrligi «Jasampaz» konsortsıýmynyń Parlament depýtattaryna joldaǵan ótinimine qatysty túsinik berdi, dep habarlaıdy QazAqparat tilshisi.
Eske sala ketsek, budan buryn otandyq kásiporyndardy biriktirip turǵan «Jasampaz» konsortsıýmy memlekettik qorǵanys tapsyrystarynyń (MQT) oryndalýy boıynsha jańa zań jobasyna kúdikterin bildirip, Parlament depýtattarynan atalmysh máselege nazar aýdarýdy suraǵan edi.
Atalmysh mınıstrlikten habarlaǵandaı, «Qorǵanys ónerkásibi jáne memlekettik qorǵanys tapsyrysy týraly» jańa zań jobasynda memlekettik qorǵanys tapsyrysyn oryndaýshy retinde zańdy tulǵalar birlestiginiń (konsortsıýmnyń) qatysýy shekteletindigi týraly aqparat durys emes.
«Konsortsıým» túsinigi zańnamalyq turǵyda Qazaqstan Respýblıkasynyń Azamattyq kodeksinde bekitilgen. Zań jobasynda kásiporyndar Otandyq taýar óndirýshilerdiń, tasymaldaýshylar men qyzmetterdiń reestriniń talaptaryn saqtaǵan jaǵdaıda konsortsıým retinde birigý múmkindigi bar. Memlekettik qorǵanys tapsyrystaryn júzege asyrýda konsortsıýmdardyń qatysýyna eshqandaı kedergi joq. Elimizdiń qoldanystaǵy zańnamasyna sáıkes, konsortsıýmdar memlekettiń kez kelgen salasyna, sonyń ishinde MQT-ǵa da qatysa alady», - dep habarlady mınıstrliktiń baspasóz qyzmetinen.
Atap ótilgendeı, otandyq óndirýshilerdiń konsortsıýmǵa birigýi sońǵy ónimdi tańdaý kezinde qazaqstandyq quram úlesin arttyrýǵa aıtarlyqtaı úlesin qosady. Bunyń MQT atqarýshysyn tańdaýda úlken mańyzǵa ıe ekenin atap ótý kerek. QR Qorǵanys jáne aeroǵarysh mınıstrligi otandyq taýar óndirýshiler men qyzmet kórsetýshilerdiń paıdasyna qaraı, tipti otandyq taýar baǵasy basqa óndirýshilerden 10 nemese 20 paıyzǵa qymbat bolǵan jaǵdaıda da MQT normalaryn oryndaý erejelerin qarastyrýǵa daıyn.
«MQT oryndalýyna qatysýǵa jeńil ónerkásip salasyndaǵy otandyq kásiporyndardyń úlesi eshbir shektelmeıdi. Burynǵysha, reestrge kirgizýde talaptarǵa saı keletin, osy salada ónim óndiretin kásiporyndardyń kópshiligi MQT oryndalýyna qatysa alady. «Jasampaz» konsortsıýmyna keler bolsaq, qazirgi ýaqytta onyń qatysýshylary resstrde bar. Sondyqtan, bul jerde óndiristi toqtatý nemese jeńil ónerkásip salasyndaǵy 6 myń jumysshyny bosatylýy týraly aıtylyp turǵan joq», - delingen habarlamada.
Mınıstrlikten habarlanǵandaı, qorǵanys salasyndaǵy 2019 jyldyń tapsyrysy osy jyldyń mamyr aıynda josparlanyp qoıǵan. Sol sebepti, MQT oryndalýyn qurylymdaý, jarııalaý jáne oryndaý bóligi týraly normalar 2020 jyldyń 1 qańtaryna deıin kúshinde bolady.
«QR Qorǵanys jáne aeroǵarysh mınıstrligi óz tarapynan «ashyq dıalogqa» árdaıym daıyn. Mınıstrlik barlyq múdddeli taraptarmen atalmysh máseleni talqylaýǵa daıar», - delingen mınıstrlik aqparatynda.
