Qorǵaljyn qoryǵynda balyq aýlaǵan brakonerler ustaldy

KÓKShETAÝ. QazAqparat – Aqmola oblysyndaǵy Qorǵaljyn qoryǵynda zańsyz balyq aýlaǵandar ustaldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.

Vedomstvonyń málimetinshe, 6 mamyr kúni Qorǵaljyn aýdandyq tabıǵatty qorǵaý polıtsııasy bóliminiń qyzmetkerleri men memlekettik tabıǵı qoryqtyń jumysshylary qoryq aýmaǵynda brakonerlerdiń zańsyz balyq aýlap júrgenin anyqtady. Kúdiktiler 39 jáne 51 jastaǵy jergilikti turǵyndar, mono aý arqyly balyq aýlaǵan. Olardan aýlanǵan sý janýarlary, qaıyq, aý tárkilenip, keltirilgen shyǵyn kólemi anyqtalýda.

«Kúdiktilerge qatysty QR QK-niń 335-baby 3-bóligi boıynsha («Balyq resýrstaryn, basqa da sý janýarlaryn nemese ósimdikterin zańsyz alý») sotqa deıingi tergeý amaldary júrgizilýde», - dedi departamentten.