Koreıamen jasandy ıntellekt salasyndaǵy yntymaqtastyq keńeımek
ASTANA. KAZINFORM - Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Koreıa Respýblıkasyna resmı saparmen bardy. Sapar sheńberinde ol Prezıdent ıÝn Sok Elmen kezdesip, Syrtqy ister mınıstri Chjo Te Elmen ekijaqty kelissózder júrgizdi. Bul týraly SІM baspasóz qyzmeti habarlady.
Koreı memleketiniń basshysymen kezdesý barysynda sońǵy jyldary qol jetkizilgen ekijaqty saıası dıalogtyń joǵary deńgeıi atalyp ótti. Koreıa Respýblıkasynyń Prezıdenti qazaq-koreı strategııalyq ózara tıimdi áriptestigin nyǵaıtý maqsatynda Qazaqstanmen kópjosparly yntymaqtastyqty odan ári arttyrýdyń mańyzdylyǵyna nazar aýdardy.
Óz kezeginde, M. Nurtileý Koreıa Respýblıkasynyń kóshbasshysyna QR Prezıdenti Qasym-Jomart Toqaevtyń jyly lebizderi men izgi tilekterin jetkizip, Koreıa Respýblıkasy 30 jyldan astam dıplomatııalyq qatynastar barysynda ósip kele jatqan ekonomıkalyq jáne mádenı baılanystar qoldaıtyn berik saıası dıalog qurylǵan Azııa óńirindegi mańyzdy jáne senimdi seriktes ekenin atap ótti.
Sol kúni QR SІM basshysy Koreıa Respýblıkasynyń Syrtqy ister mınıstri Chjo Te Elmen ekijaqty kelissózder júrgizdi. Taraptar saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy qazaq-koreı yntymaqtastyǵynyń negizgi máselelerin talqylady.
Suhbat barysynda Koreıa Respýblıkasy Prezıdentiniń jaqynda Qazaqstanǵa jasaǵan memlekettik sapary eki eldiń qarym-qatynasyn odan ári damytýǵa qýatty serpin bergeni atalyp ótti.
M. Nurtileý Koreıa Respýblıkasy Qazaqstannyń eń iri 5 ınvestorynyń qataryna kiretinin jáne ótken jyldyń qorytyndysy boıynsha ekijaqty saýda kólemi 6 mlrd AQSh dollaryna jetkenin aıtty. Іskerlik baılanystardy jandandyrý jáne ınvestıtsııalyq ózara is-qımyldy keńeıtý usynyldy.
Tsıfrlyq jáne bilim berý jobalary da kelissózderdiń mańyzdy taqyrybyna aınaldy. Kezdesý barysynda Qazaqstan men Koreıa Respýblıkasy «Astana Hub» IT-parkin damytý sheńberinde, sondaı-aq jasandy ıntellekt jáne úlken derekter jónindegi Ulttyq ortalyqty qurý máseleleri boıynsha yntymaqtasyp jatqany aıtyldy. «SeoulTech» ýnıversıteti sııaqty koreı joǵary oqý oryndarynyń qoldaýymen elimizde jańa bilim berý jáne ǵylymı mekemeler ashý josparlanýda.
Gýmanıtarlyq baılanystar ekijaqty seriktestiktiń mańyzdy aspektisi bolyp qala beredi. M. Nurtileý Qazaqstanda turatyn 120 myń koreı halyqtar arasyndaǵy «altyn kópir» rólin atqaratynyn atap ótti.
«Eki eldiń mádenı-gýmanıtarlyq baılanystarynyń údemeli damýy, sondaı-aq ekijaqty vızasyz rejım, eki eldiń astanalary arasynda jańa tikeleı áýe reısteriniń ashylýy jáne ósip kele jatqan týrıstik aǵyn bizdiń halyqtarymyzdy odan ári jaqyndastyrýda», – dedi QR SІM basshysy.
Óz kezeginde Koreıa Respýblıkasy syrtqy saıası vedomstvosynyń basshysy Qazaqstan Ortalyq Azııadaǵy eń adal jáne senimdi seriktes ekenin atap ótti. «Sizdiń óńirińizge salynǵan koreı ınvestıtsııasynyń jartysynan kóbi Sizdiń elińizge tıesili, sondyqtan biz dostyq qarym-qatynasymyzdy óte joǵary baǵalaımyz», – dedi ol.
Nátıjeli kelissózderdiń qorytyndysy boıynsha syrtqy saıası vedomstvolardyń basshylary joǵary deńgeıde saparlar ótkizý jáne basym salalarda jańa bastamalar ázirleý týraly ýaǵdalastyqtardy qamtıtyn Qazaqstan Respýblıkasy men Koreıa Respýblıkasynyń syrtqy ister mınıstrlikteri arasyndaǵy 2025-2027 jyldarǵa arnalǵan yntymaqtastyq jónindegi is-qımyl josparyna qol qoıdy.
Qazaqstan Syrtqy ister mınıstriniń Koreıa Respýblıkasyna resmı sapary aıasynda Qazaqstannyń týrıstik áleýetine arnalǵan qazaq-koreı mádenı fotokórmesi ótti, ol aǵymdaǵy jyldyń 5 qarashasyna deıin jalǵasady.
