Koreıaǵa jumysqa ketken shymkenttik qylmys jasady dep aıyptalýda
Shetelde nápaqa taýyp júrgen qazaqstandyq qazir qamaýda. Onyń ákesi Qaısar Sherimniń sózine qaraǵanda, uly osy jyldyń aqpan aıynda Koreıaǵa jumysqa ketken. Sebebi anasy obyr dertine shaldyqqan soń, onyń emine kóp qarajat kerek bolypty. Biraq Amanat shetelde júrip keleńsiz jaǵdaıǵa tap bolǵan.
«Ońtústik Koreıa eliniń azamatshasy ulym Amanattyń ústinen zorlady dep polıtsııaǵa aryzdanǵan. Men balamnyń bul qylmysty jasamaǵanyna tolyq senimdimin. Óıtkeni ol mundaı qylmysqa barmaıdy. Onyń jazyqsyz qamalǵanyn janyndaǵy joldastary da aıtyp otyr. Biraq aıtaıyn dese káris tilin bilmeıdi. Bolmaǵan soń elshilikke de hat jazyp, kómek suradyq. Ol jaqtaǵylar zańsyz jumysqa barǵandarǵa kómektese almaımyz, tek baqylaýda ustaımyz dep qysqa jaýap berdi», - deıdi Qaısar Sherim.
Belgili bolǵandaı, Amanat Jumash Ońtústik Koreıada ár túrli jumys istegen. Ony polıtsııa qamap qoıǵany jóninde sol elde júrgen joldastary habarlapty.
«Balamnyń janyndaǵy da jumysqa zańsyz túrde barǵan. Sondyqtan olardy da kýáger bolýǵa jibermeı otyr eken. Áıtpese bolǵan jaǵdaıdy aıtyp, kýáger bolýǵa daıynbyz dep otyr. Onyń ústine báriniń de káris tilin bilmeıtini bar. Men elimizdiń Syrtqy ister mınıstrliginen kómek suraımyn. Osy iske aralassa, istiń aq qarasyn anyqtaýǵa kómektesse eken. Qazir biz sol jaqqa barýǵa jolǵa aqsha jınap jatyrmyz. Onyń ózine bir mıllıon teńgeden kóp qarajat ketedi»,- deıdi Amanat Jumashtyń ákesi.
Qaısar Sherimniń aıtýynsha, sot bir aıdan astam ýaqyttan keıin bolady. Eger Amanatty osy qylmys boıynsha aıypty dep tapsa, 5 jyldan 20 jylǵa deıin bas bostandyǵynan aıyrýy múmkin.
