Koreıada ótip jatqan qazaqstandyq kórmege 30 myń adam kelgen
Arnaıy avtobýs kelýshilerdi Seýl men Sývon qalalarynda ótip jatqan «Altyn adam» men qazaqstandyq sýretshiler kórmesine alyp barady.
Qazaqstannan «Altyn adam» kórmesi keldi» degen habar Seýlge tez tarap úlgerdi. Ol týraly aqparatty kósheden de, metro men teledıdardan da kórýge bolady. Qazaq zergerleriniń qolynan shyqqan jaýharlar týraly habar basqa da qalalarǵa jetti. Tamashalýǵa asyqqandardyń qatary kóbeıgendikten, Koreıa mýzeıiniń qyzmetshileri arnaıy saıahat uıymdastyrýǵa májbúr boldy. 40 adamnan turatyn toptardy Sývonnan Seýlge deıin art-avtobýstar jetkizedi.
Kórmege kelýshiler ulttyq áshekeılerdi tamashalap, Qazaqstannyń zamanaýı tarıhy týraly dáristerdi de tyńdaýǵa múmkindik aldy. Qazaqstan Koreıadan jıyrma jeti ese úlken. Qazaqstannyń elordasy Almatydan Astanaǵa kóshirildi. Almatyny bizdiń ejelgi astanamyz Kendjýmen salystyrýǵa bolady. Kórme kireberisinde ornalasqan birinshi jádiger - altynshy ǵasyrdaǵy altyn qanjar. Ol Kendjý qalasyndaǵy mazardan alynǵan. Uqsas naqyshtary bar qarý Býrabaıda tabylǵanyn bilemiz.
«Qorǵandar men basqa da tabylǵan zattardyń bir-birine uqsastyǵy eki el mádenıetiniń jaqyn bolǵanyn kórsetkendeı oı qaldyrady. Kelýshiler de soǵan tańǵalyp jatyr. Qazaqstanda tabylǵan buıymdardy zerttegende, olardyń quramyndaǵy mystyń úsh paıyzǵa teń ekeni rastaldy. Al Koreıada tabylǵan zattarda mys nebári bir paıyzǵa para par. Bul derekter órkenıetter qansha qashyq bolǵanymen, olardyń arasynda baılanys bolǵandyǵyn dáleldese kerek», - deıdi gıd Pak Chom Býn.
Art-avtobýstyń ekinshi beketi - Sývon óner mýzeıi. Onda ótken jyldyń qarasha aıynan bastap Qazaqstan sýretshileriniń týyndylary qoıylǵan.
«Kórmeni otyz myńdaı adam kórip úlgerdi. Bul Qazaqstanǵa arnalǵan alǵashqy kórme bolǵandyqtan, kelýshilerdiń qyzyǵýshylyǵynda shek bolmady. Mádenıet, ulttyq taǵamdar jaıynda, tipti turmys týraly kóp suraq qoıyp jatty. Biz tek kórme uıymdastyrýmen shektelmeı, kofe iship, qazaq mádenıetin bilýge múmkindik beretin oqý baǵdarlamalaryn ótkizdik»,- Suwon I Park óner mýzeı kórmesiniń tálimgeri Shın Yn En.
«Qazaqstan sýretshileri kórmesine kelýshiler qazaqtyń ulttyq kıimin kııýge múmkindik aldy. Eń ádemi shapan Qazaqstannyń ulttyq mýzeıi atynan Sývon kórme basshysyna syıǵa tartyldy, al qalǵan kıimderdi mýzeı qyzmetkerleri satyp aldy», - deıdi tilshi Vladıslav Tsoı.
Máselen, Emılııa Babadtyń qolynan shyqqan sýretten kórmege kelýshiler qobyz týraly málemet aldy. Al Olga Kýjelenkonyń týyndysy olardy qymyzben tanystyrdy.
«Qazaqstan týraly estýim bar. Biraq shynyn aıtqanda, eshteńe bilmedim. Qazir kózim jetkendeı boldy, tarıhy tereńde jatqan memleket eken. Tipti bul el altyn óndirýdi ejelden biletin bolyp shyqty. Óndirý tehnologııasynyń joǵary deńgeıde bolǵany qatty tańǵaldyrdy. Sáti tússe, mindetti túrde Qazaqstanǵa baramyn»,- deıdi Sývon qalasynyń turǵyny Choı Mýn Chol.
Ońtústik Koreıada ótip jatqan Qazaqstannyń eki kórmesi de osy aptada jumysyn aıaqtaıdy. Biraq qos memlekettiń mádenı yntymaǵy jalǵasa beredi. Koreıaǵa Qazaqstannyń budan da basqa mýzeıleri keledi. Esesine, qazaq dalasynda ońtústikkoreıalyq arheologtar qazba jumystaryn júrgizedi. Árıne bul jumystardyń deni ejelgi qazaqtar men koreı ultynyń turmys-tirshiliginen kóp málimet alýǵa múmkindik beredi.
