Koreıada bala qaǵyp ketken qazaqstandyqqa qatysty jańa málimetter jarııalandy

NUR-SULTAN. QazAqparat – QR Syrtqy ister mınınstriliginde Ońtústik Koreıada kishkentaı balany kólikpen qaǵyp ketý kúdigine ilikken qazaqstandyqqa qatysty tyń málimetter aıtyldy, dep habarlaıdy QazAqparat tilshisi.

«Bul oqıǵa rezonansty sıpatqa ıe boldy. Bizdiń konsýl tergeýshimen jáne bizdiń azamatpen de eki ret kezdesti. Ol qamaýda ustaý jaǵdaıyna shaǵym aıtpaǵan, sondaı-aq jergilikti tergeý sharalary tarapynan qysym kórsetilmegen. Bastapqyda oǵan Ońtústik Koreıa tarapynan memlekettik advokat usynyldy. Qazirgi kezde jeke advokatty jaldaý qarastyrylyp jatyr», - dedi QR Syrtqy ister mınıstrliginiń resmı ókili Aıbek Smadııarov vedomstvoda ótken brıfıngte.

Onyń sózine qaraǵanda, Seýldegi Qazaqstan elshiligi bilikti qorǵaýshyny izdestirý turǵysynda barlyq qajetti sharalardy atqarýda.

«Tergeýshimen kezdesý qorytyndysy boıynsha oǵan birneshe aıyp taǵyldy. Osy oraıda oqıǵa ornynan qashý, kólik quralyn tirkeý kezinde mindettemelerdi buzý, saqtandyrýdyń joqtyǵy, sondaı-aq júrgizýshilik kýáliktiń bolmaýy sekildi aıyptar aıtyldy. Jalpy, koreı jaǵynyń málimetterine qaraǵanda, oǵan bes jylǵa deıin bas bostandyǵynan aıyrý nemese tıisti deńgeıdegi aıyppul somasy túrindegi jaza berilýi múmkin», - dedi resmı ókil.

Eske sala keteıik, biraz ýaqyt buryn Qazaqstan azamaty Ońtústik Koreıada kishkentaı balany qaǵyp, oqıǵa ornynan izin sýytqan edi.

Keıin onyń Pavlodarda júrgeni belgili boldy.

14 qazanda Qazaqstan azamaty tergeý is-sharalaryna qatysý úshin Seýl qalasyna óz erkimen ushyp bardy.