Koreıa men Qazaqstan arasyndaǵy saýda kólemi 278%-ǵa ulǵaıdy
«2014 jyly saýda aınalymynyń jalpy kólemi 1 mlrd 460 myń dollardy quraǵan. Munaı baǵasy tómendep, ekonomıkanyń toqyraýy saldarynan 2015 jyly bul soma 55%-ǵa tómendedi jáne 760 mln dollardy kórsetti. Ótken jyly bul kórsetkish taǵy 16,9%-ǵa quldyrap, 650 mln dollardy qurady. Sonymen birge, bıylǵy qańtar aıynan sáýir aıyna deıingi saýda aınalymynyń somasy ótken jylǵy kezeńmen salystyrǵanda 390 mln dollarǵa deıin 278 paıyzǵa artty», - dep málimdedi Koreıanyń «KOTRA» saýda jáne ınvestıtsııalar boıynsha agenttiginiń basshysy Kang Sang Ep Astanada ótken Qazaqstan men Ońtústik Koreıanyń yntymaqtastyq forýmynda.
Agenttik basshysynyń aıtýynsha, bul kórsetkishter Qazaqstan ekonomıkasynyń jaqsarǵanyn bildiredi. Ótken jyly Koreıanyń Qazaqstanǵa eksporty 360 mln dollarǵa deıin 19,9%-ǵa tómendegen edi. Sondaı-aq, bıylǵy qańtar-sáýir aılarynda eksport kólemi ótken jylǵy kezeńmen salystyrǵanda 91,5%-ǵa artyp, 140 mıllıon dollardy qurady. Negizgi eksport ónimderi - kabel, jylytý qurylǵylary, sıntetıkalyq shaıyr, avtobólshekter, jeńil avtokólikter, aýyr qurylys tehnıkasy jáne kosmetıka.
«Jyl saıyn tómen kórsetkishter kórsetken ımport kólemi bıyl edáýir ulǵaıǵan. Ótken jyldyń qańtar-sáýir aılarymen salystyrǵanda, bıylǵy tórt aıda ımport ósimi 250 mln dollarǵa jetip, 594%-dy qurady. Ótken jyly tutas ımport kóleminiń 280 mln dollardy quraǵanyn eskersek, bul tamasha kórsetkish. Koreıa Qazaqstannan 180 mln dollarǵa ýran ımporttady, odan bólek ferroqorytpa, munaı, metalldar, janýarlardan alynatyn dárilik preparattar, mys jáne allıýmınıı jetkizilgen», - dep túsindirdi Kang Sang Ep.
«KOTRA» agenttiginiń basshysy bul derekterdiń Koreıanyń kedendik qyzmeti negizinde keltirilgenin atap ótti.
