Koreıa qazaq sportshylaryn qalaı qarsy aldy — eksklıýzıv suhbat
ASTANA. KAZINFORM – Erteń, ıaǵnı 19 qańtar kúni Ońtústik Koreıanyń Kanvon qalasynda IV qysqy jasóspirimder olımpıadasynyń alaýy tutanady.
Osyǵan oraı KAZINFORM tilshisi Kanvonǵa sportshylardy bastap alyp ketken Týrızm jáne sport mınıstriniń keńesshisi Dıas Ahmetsháripke arnaıy qońyrý shalyp, Aq Olımpıada aldyndaǵy daıyndyqtary barysynda suhbat aldy.
- Ońtústik Koreıa sportshylarymyzdy qalaı qarsy aldy?
- Ulttyq qurama Astanadan Almatyǵa, sosyn Almatydan Seýilge aman-esen ushyp jetti. Áýejaıdan túse salysymen bizdi eriktiler óte joǵary deńgeıde kútip aldy. Olımpıada oıyndarynyń boıtumarlary men nyshandary beınesinde kıinip alǵan eriktiler óte jaqsy qarsy aldy. Sondaı-aq, Qazaqstannan aldyn ala kelgen shtab ókilderi barlyǵymyzdy túgendep, shaǵyn kólikterge otyrǵyzyp Kanvonǵa alyp bardy. Seýil men Kanvon arasy 270 shaqyrym eken. Jol boıyndaǵy qyzmet servısterine qatty tańǵaldyq. Kelip jatqan olımpıadashylarǵa óte joǵary deńgeıde sapaly qyzmet kórsetedi eken. Kanvonǵa jetken boıda birden akkredıtatsııa ortalyǵyna bardyq. Sol jerden sportshylar ózderiniń, basqa delagatsııa músheleri ózderiniń akkredıtatsııalaryn alyp, qonaq úılerge jaıǵastyq. Barlyǵyn óte yńǵaıly ornalastyryp qoıypty.
- Bara qalǵanda olımpıadashylarymyzdy tańǵaldyrarlyq tosyn syılar boldy ma?
- Sportshylarymyz óte joǵary kóńil kúıde boldy. Bara salyp eriktiler bizdiń sportshylarymyzdy qushaqtap, birge sýretke túsip, bir-birimen jyldam shúıirkelesip jatty. Meniń bir tańǵalǵanym bizdiń Ulttyq qurama músheleri aǵylshyn tilin óte jaqsy biledi eken. Qazirgi jas býynnyń artyqshylyǵy shet tilderin óte jaqsy meńgergen. Barlyǵy mektep oqýshylary bolǵan soń aǵylshyn tilin jaqsy meńgergen eken. Óz basym jastarymyzǵa qatty tánti boldym.
- Sportshylarymyzǵa Olımpıadanyń aýrasy qalaı áser etip jatyr?
- Halyqaralyq olımpıadalyq komıtetiniń jastar arasyndaǵy oıyndardy uıymdastyrýdaǵy basty maqsaty – dúnıejúzindegi balalardyń basyn qosyp, balalardy bir-birimen jaqyndastyrý, bir-birimen tanystyrý. Osy sport arqyly tatýlyqty, berekeni sezindirý. «Sport dostyqtyń elshisi» deıdi ǵoı, olımpıadalyq qozǵalys osy qaǵıdany ustana otyryp, jarysty joǵary deńgeıde ótkizýdi kózdep otyr. Olımpıadalyq qalashyqta, qonaqúıdiń mańynda úlken-úlken oıyn alańdaryn ashyp qoıǵan. Balalar jattyǵýdan tys, bos ýaqyttarynda bir-birimen tanysyp, neshe túrli oıyndar oınap jatyr.
- Sportshylarymyz tolyǵymen baryp boldy ma?
- Sportshylarymyzdyń 90 paıyzy kelip boldy. Tek shańǵyshylarymyz ǵana kelgen joq. Olar Aqmola oblysy Şýche qalasynda sońǵy oqý-jattyǵý jıyndaryn ótkizip jatyr. Buıyrsa 24 qańtar kúni ushyp shyǵyp, 25 qańtarda Koreıaǵa keletin bolady.
- Olımpıadashylarymyz qazir qonaqúılerge tolyǵymen jaıǵasyp bolǵan bolar. Jatyn oryndar kóńilderińizden shyǵyp jatyr ma?
- Iá, biz keshe jýrnalıster bar, barlyǵymyz birigip, arnaıy olımpıadalyq qalashyqqa baryp, sportshylarymyzdyń turyp jatqan qonaqúılerimen tanysyp, suhbattasyp, tildesip qaıttyq. Qonaqúıdiń erekshelikterine qaraı eki, úsh, tórt oryndyq bólmeler bar eken. Eń bastysy qonaqúıler jyly, taza eken. Tósek oryndary da jumsaq, mamyq jastyq, jýynatyn bólmeleri de óte yńǵaıly. Ne kerek, barlyǵy oılastyrylǵan eken.
- Tamaq jaǵy qalaı? As mázirine úırenisip jatyr ma?
- Tamaq jaǵyna kelsek, tamaqtyń san túri bar eken. Halal tamaqtary da jeterlik. Bul jerde tek Azııa elderi ǵana emes, álemniń 70 memleketinen sportshylar kelip jatqandyqtan ár qurlyqtyń, ár eldiń stılinde jasalǵan tamaqtar jıyntyǵy bar. Kim neni iship-jegisi keledi, bári daıyn. Árbir qonaqúımen tamaqtaný oryndarynyń irgesinde medıtsınalyq ortalyqtar ornalasypty. Dámhanalar da medpýnktter de 24 saǵat boıy qyzmet kórsetip tur.
- Aýa raıy qalaı eken?
- Qazir aýa raıy Astanamyz sııaqty shaqyldap turǵan joq. -5 gradýs kóleminde bolyp tur. Dese de, ylǵal óte kúshti eken. Qansha degenmen, teńizdiń jaǵasy ǵoı. Balalarymyzǵa jyly, qalyń kıinýdi tapsyrdyq. Bizdiń Ulttyq quramaǵa arnaıy tigilgen formalar óte jyly, yńǵaıly. Sondyqtan, bizdiń sportshylarymyzǵa sýyq tıip qalady dep asa bir qaýiptenip otyrǵan joqpyz.
- Forma týraly aıtyp qaldyńyz ǵoı. Bizdiń sportshylarymyzdyń formasy ózge eldiń sportshylarymen salystyrǵanda qalaı kórinip jatyr?
- Bizdiń quramanyń formasy óte ádemi bolypty. Túsi de, formasy da keremet. Ózge elden kelgen sportshylar da, eriktiler de bizdiń sportshylardy ortaǵa alyp sýretke jıi túsýde. Bizdiń balalar aǵylshynsha taqııamyzdy tanystyryp, kez kelgen qyz-jigittermen til tabysyp ketip jatyr.
- Jalpy, sportshylarymyz Koreıaǵa Olımpıadaǵa qatysý úshin barǵandaryn qalaı sezinip jatyr?
- Jarysqa kelgenimen, kelmeı jatyp, áke-sheshemdi saǵynyp kettim degen sportshylarymyz da joq emes. Bizdiń quramanyń kapıtany Erasyl Shyńǵyshannyń ózi úıimdi, ata-anamdy saǵyndym dep jatyr. Balalardyń qasyna baryp, aqyl keńesimizdi aıtyp, týystaryna vıdeo qońyraý jalǵap, sóılestirip jatyrmyz.
- Jalpy Oıynǵa daıynsyzdar ǵoı. Júldege talasa alamyz ba?
- Jarysqa saqadaı saımyz. Dese de, júlde alý ońaı emes. Biz hokkeıden, shańǵy sportynan baq synaıtyn amerıkalyqtardy, norvegııalyqtardy, nemis komandalaryn, aýstrııalyqtardy, eýropadan kelgen taǵy da birqansha komandalardy kórip qaldyq. Túgeldeı eńgezerdeı-eńgezerdeı azamat sııaqty kórindi bizge. Al bizdiń balalar olardyń qasynda áli bala sııaqty. Mektep oqýshylary degenge sengiń kelmeıdi. Biraq bizdiń sportshylardyń arasyndada jaqsy sportshylarymyz bar. Barlyǵyn jarys kórsetedi. Qazaqta «baq shaba ma, bap shabama» degen bar. Úmitimiz zor. Elimizge medalmen qaıtsaq degen nıettemiz.
- Áńgimeńizge rahmet! Jeńispen oralýlaryńyzǵa bizde tilektespiz.
