Qordaılyqtardyń máseleleri «Beıbitshilik pen kelisim» jobasy aıasynda sheshilýde
Jambyl oblysy ákimdiginiń málimetinshe, aqparattyq-túsindirý toptarynyń quramyna 107 adam engen. Olardyń qatarynda memlekettik jáne quqyq qorǵaý organdarynyń, prokýratýranyń, etnomádenı birlestikterdiń jáne úkimettik emes uıymdardyń, kásipkerlerdi qoldaý ınstıtýttarynyń ókilderi, depýtattar, ımamdar bar. Olar Qordaı aýdanynyń aýyldarynda turǵyndarmen kezdesýler ótkizip, usynystar men shaǵymdarǵa qulaq túrdi. Onda mádenı-kópshilik, sporttyq is-sharalar, qoǵamdyq qabyldaýlar uıymdastyrylyp, keńes berý alańdary jumys istedi. Jergilikti atqarýshy organdardyń qyzmetkerleri de ádistemelik kómek ala bildi.
«Toptar bes baǵyt boıynsha jumys istep, memlekettik saıasatty túsindirý, áleýmettik jáne dinı saladaǵy máselelerdi saralap, jergilikti quqyq qorǵaý organdarynyń jumysyn, aýyldaǵy bıznesti damytý sharalaryn zerttedi», - dep atap ótti ishki saıasat basqarmasynyń basshysy Daýyl Beısenqulov.
Taldaý nátıjesinde basym salalar anyqtaldy. Olar – mádenıet, sport, jastar saıasaty, til máseleleri.
Alǵa, Sulýtór, Sortóbe, Masanshy aýyldarynda jastarǵa arnalǵan sport mektepteri men shyǵarmashylyq ortalyqtar, al Otar aýylynda sport kesheni salý qajettiligi kóterildi. Buqaralyq sportty damytý úshin oblystyq jáne respýblıkalyq deńgeıdegi týrnırlerdi júıeli túrde ótkizýdiń mańyzdylyǵy aıtyldy.
Keıbir aýyldarda aýyldyq klýbtar joq. Stýdentter arasynda ózara dostyq qarym-qatynasty nyǵaıtý úshin aýdan ortalyǵynda Dostyq ortalyǵyn ashý usynyldy. Jas otbasylardyń turǵyn úı máselesin sheshý úshin jańa jataqhana salý kerek.
Sondaı-aq, Qarasý aýylyndaǵy orta mektep oqýshylarynyń ata-analary balalardy tasymaldaý úshin avtobýs bólýdi surady. Al, Masanshy aýylynda feldsherlik-akýsherlik pýnkt qajet.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Tımýrjan Nurymbetovtyń basshylyǵymen atalmysh joba aıasynda ekinshi top otbasylarǵa ataýly áleýmettik kómek qujattaryn resimdeýge, jumyssyzdarǵa, erekshe qajettiligi bar aýyl turǵyndaryna shıpajaıǵa joldamaǵa qol jetkizýge jáne mindetti gıgıenalyq quraldar alýǵa kómektesti.
«Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy boıynsha bes adam qysqa merzimdi kásiptik oqýǵa jiberilse, úsh adam qoǵamdyq, tórt adam áleýmettik jumysqa ornalasqan. Taǵy ekeýi jastar praktıkasynan ótýde desek, 15 aýyl turǵyny grant ıelenip bıznes-jobamen jumys isteý baǵytynda keńes ala aldy. Al, 11 otbasy elimizdiń soltústigine kóshýge daıyn.
Sonymen qatar turǵyndarǵa medıtsınalyq tekserý júrgizilip, eki turǵynǵa otaǵa kvota berildi.
Budan bólek, koronavırýstyń aldyn alý, mindetti medıtsınalyq saqtandyrý taqyryptary boıynsha semınarlar ótti.
Basqosýda oblystyq kásipkerlik jáne ındýstrıaldy-ınnovatsııalyq damý basqarmasy basshysynyń orynbasary Jandáýlet Kenjebekov úshinshi toptyń jumysy týraly baıandady. Ol bıznesti damytý baǵytynda Qordaı aýdanynda 219 mıllıon teńgege 51 joba iske asyrylatynyn, ol boıynsha Damý ınstıtýttarynyń fılıaldary qoldaý kórsetetinin jetkizdi.
Basqarma basshysynyń orynbasary Masanshy, Sortóbe, Aýqatty aýyldarynda óńirlik kásipkerler palatasymen birge kásipkerlik kýrstaryn ótkizý, bıznesti memlekettik qoldaýdyń barlyq sharalary týraly jeke semınarlar uıymdastyrýdy usyndy.
Al tórtinshi toptyń jumysyna toqtalǵan din isteri basqarmasynyń basshysy Jangeldi Omarov 62 meshit pen alty shirkeýde kelýshilerimen kezdesý ótkizilgenin tilge tıek etti. Onda dinı saladaǵy memlekettik saıasat jáne zańnama normalary túsindirilgen.
Sonymen qatar, jıynda quqyq qorǵaý blogy tobynyń jumysy da tyńdaldy. Ol týraly Jambyl oblysy prokýrorynyń orynbasary Qanat Mamaev habarlady.
Qordaı aýdanynyń ákimi Rústem Dáýlet barlyq jumys toptarynyń eskertýleri eskerilgenine, olardy joıý boıynsha tıisti jumystar júrgiziletinine sendirdi.
«Beıbitshilik jáne kelisim» jobasy sheńberinde Qordaı aýdanynyń jol kartasy jasalyp, oǵan keńeste talqylanǵan barlyq máseleler enetin bolady. Mundaı sharalar basqa aýdandarda da ótedi. Bizdiń basty maqsatymyz – qoǵamdyq-saıası ahýaldyń monıtorıngi, jergilikti halyqty tolǵandyratyn problemalyq máselelerdi anyqtaý jáne sheshý. Sizderdiń barlyq usynystaryńyz muqııat nazarǵa alynyp, aıaǵyna deıin jetkizilýi tıis», - dep túıindedi sózin oblys ákimi Berdibek Saparbaev.
