Qordaıdaǵy oqıǵa boıynsha 47 adam ustaldy - ІІM
«Qazirgi ýaqytta 47 adam ustalyp, polıtsııa bólimine jetkizildi. Olardan eki ańshy qarýy tárkilendi. QR Qylmystyq kodeksiniń 272-baby (jappaı tártipsizdikti uıymdastyrý jáne soǵan qatysý) jáne 99-baby (kisi óltirý) boıynsha sotqa deıingi tergeý amaldary júrgizilip jatyr. Qoǵamdyq tártipti buzǵandardyń bári de zańǵa sáıkes jaýapkershilikke tartylady. Qoǵamdyq tártipti qadaǵalaý maqsatynda oqıǵa ornynda qazirgi ýaqytta polıtsııa qyzmetkerleri men Ulttyq ulan sarbazdary jumyldyrylǵan», - dedi Erlan Turǵymbaev OKQ-da ótken baspasóz máslıhatynda.
Eske sala ketsek, buǵan deıin Erlan Turǵymbaev Qordaıdaǵy oqıǵa saldarynan 8 adamny kóz jumǵanyn málim etken edi.
«7 aqpanda saǵat 19.00-de Jambyl oblysynyń Polıtsııa departamentiniń kezekshi bólimine Qordaı aýdany Masanchı aýylynda 70-ten astam adam tóbelesip jatyr degen habarlama kelip tústi. Zańsyz áreketterdi toqtatý úshin oqıǵa ornyna dereý polıtsııa qyzmetkerleri jiberildi. Sol jerde bolǵan adamdar tóbelesti vıdeoǵa túsirip, áleýmettik jeli arqyly taratqan. Osynyń saldarynan basqa aýyldardan kelgen 300-den astam azamat tóbeleske qosylyp ketken. Eki jaq bir-birine tas laqtyryp, taıaqpen uryp, qarý qoldandy. 8 adam kóz jumdy. 40-tan astam adam jaraqat aldy», - dedi Іshki ister mınıstri OKQ-da ótken baspasóz máslıhatynda.
Buǵan deıin Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles bolǵanyn habarlaǵan bolatynbyz.
Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirdi.
«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.
