Qordaıda turǵyndardyń ózekti máselelerin anyqtaıtyn joba jasaldy
Bul jóninde Jambyl oblysy ákiminiń orynbasary Erjan Jylqybaev aıtyp berdi.
«Joba tujyrymdamasyna sáıkes 5 top bekitildi. Olar aqparattyq túsindirý, áleýmettik-turmystyq máselelerdi sheshý, aýylda bıznesti damytý, dinı máseleler, quqyq qorǵaý máseleleri boıynsha jumys istedi. Osy jumystardyń qorytyndysy boıynsha arnaıy Jol kartasy bekitildi. Onyń quramyna memlekettik, quqyq qorǵaý organdarynyń, úkimettik emes uıymdardyń ókilderi, sarapshylar qaýymdastyǵy, jergilikti máslıhat depýtattary jáne t.b. 107 azamat enip otyr», - dedi Erjan Jylqybaev Ortalyq kommýnıkatsııalar qyzmetinde ótken onlaın baspasóz máslıhatynda.
Onyń aıtýynsha, «Beıbitshilik pen kelisim» jobasy barysynda 432 shara uıymdastyrylyp, oǵan 14 myńnan astam adam qamtylǵan.
«Atalǵan jobanyń tıimdiligi aýdandaǵy qoǵamdyq-saıası ahýaldy zerdeleýge, turǵyndardyń tynys-tirshiligin, kóńil-kúıin, alańdatatyn ózekti máselelerin anyqtaýǵa, áleýmettik kómek kórsetýge jáne jyldar boıy sheshimi tabylmaǵan júıeli problemalardy anyqtaýǵa múmkindik berdi. Bul másele aı saıyn oblys ákiminiń tóraǵalyǵymen tıisti basqarmalar basshylary tarapynan baqylanady», - dedi E. Jylqybaev.
Buǵan deıin spıker aýdanda zardap shekken 65 nysannyń 54-inde qalpyna keltirý jumystary bastalǵanyn habarlady.
Asyraýshysynan aıyrylý jaǵdaıyna baılanysty, qaıtys bolǵan jandardyń otbasylaryna aı saıyn orta eseppen 55 myń teńge áleýmettik járdemaqy taǵaıyndalyp, tólenip jatyr.
Sonymen birge, jyl sońyna deıin aýdanda jol jóndelip, gaz qubyry tartylady. Jańa mektepter men turǵyn úıler salynady.
