Qordaıda órtengen ǵımarattan tabylǵan máıittiń kim ekeni anyqtaldy

TARAZ. QazAqparat - Qordaı aýdany Masanchı aýylyndaǵy órtengen ǵımarattyń ishinen tabylǵan máıittiń kim ekendigi belgili boldy, dep habarlaıdy QazAqparat.

Bul týraly oblystyq polıtsııa departamentiniń baspasóz qyzmeti habarlady.

«Aǵymdaǵy jyldyń 11 aqpanynda Masanchı aýylyndaǵy órtengen saýda ǵımaratynan tabylǵan adam súıekterine qatysty júrgizilgen genetıkalyq saraptama nátıjeleri boıynsha kóz jumǵan adamnyń jeke basy anyqtaldy. Ol habar-osharsyz ketken 20 jastaǵy Murat Masanov bolyp shyqty. Onyń joǵalǵany týraly polıtsııaǵa 9 aqpan kúni ákesi xabarlaǵan»,-delingen vedomstvo málimdemesinde.

Sondaı-aq, adam óliminiń mán-jaıy búgingi tańda júrgizilip jatqan sotqa deıingi tergep-tekserý barysynda anyqtalmaq.

Eske sala ketsek, bıyl 7 aqpanda Qordaı aýdanyndaǵy Masanchı aýylynda jappaı tóbeles bolǵan. Al 8 aqpanda Memleket basshysy Jambyl oblysyndaǵy oqıǵaǵa baılanysty málimdeme jasady. Memleket basshysynyń tapsyrmasymen Qordaı aýdanyndaǵy oqıǵa saldaryn joıý jónindegi Úkimet komıssııasy quryldy.