Qordaı oqıǵasyna qatysty qandaı qylmystyq ister qozǵaldy

NUR-SULTAN. QazAqparat – Qordaı aýdanyndaǵy oqıǵa baılanysty 25-ten astam qylmystyq is qozǵaldy. Bul týraly Іshki ister mınıstrligi Tergeý departamentiniń bastyǵy Sanjar Ádilov málim etti, dep habarlaıdy QazAqparat tilshisi.

«Qylmystyq isterdi tergeýge toqtalsaq, qazirgi ýaqytta Jambyl oblysy Polıtsııa departamentiniń aýmaqtyq bólimsheleri 25-ten astam qylmystyq is qozǵady. Osy turǵyda jappaı tártipsizdik, jappaı tártipsizdikti uıymdastyrý men oǵan qatysý baby qamtylǵan. Sodan keıin jappaı tártipsizdikke qatysýǵa úndeý jasaý boıynsha qylmystyq is qozǵaldy. Altydan astam is buzaqylyq faktilerine qatysty qozǵaldy. Úsh qylmystyq is bótenniń múlkin zaqymdaý boıynsha, 10 is kisi óltirý faktisine, sondaı-aq eki is adam óltirýge oqtalýǵa qatysty qozǵaldy», - dedi Ádilov Úkimet úıinde tilshiler saýalyna jaýap bere otyryp.

Onyń sózine qaraǵanda, búginde Bas prokýratýrasynyń, Іshki ister mınıstrliginiń jáne basqa da quqyq qorǵaý organdarynyń vedomstvoaralyq tergeý toby jappaı tártipsizdik, adam óltirý boıynsha sotqa deıingi tergeýdi júrgizýde. Atalǵan ister boıynsha qazirgi ýaqytta qamaýǵa alynǵan adamdar bar.

«Zanama talaptaryna sáıkes, osy kezeńde aldyn ala tergeý málimetterin jarııa etýge bolmaıdy. Kezek kúttirmeıtin tergeý amaldary júrip jatyr», - dedi Sanjar Ádilov.

Eske salaıyq, 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy jappaı tóbelesti arandatýshylar óz paıdasyna qoldanbaq bolǵanyn málimdedi.

Sondaı-aq vıtse-premer Berdibek Saparbaevtyń tóraǵalyǵymen úkimettik komıssııa qurylatynyn, qaza bolǵandardy jerleý, zardap shekkenderge kómektesý jumystary uıymdastyrylatynyn, qoǵamdyq tártipti buzǵandar anyqtalyp, qatań jaýapqa tartylatynyn málim etti. Bas prokýratýraǵa, Ulttyq qaýipsizdik komıtetine tıisti tapsyrma berildi.