Qor naryǵynda dollar sál qymbattady

ALMATY. KAZINFORM — Qazaqstan qor bırjasyndaǵy (KASE) saýda-sattyq qorytyndysy boıynsha, 1 dollardyń teńgege shaqqandaǵy baǵamy ósti.

KASE qor naryǵyndaǵy kúndizgi saýda qorytyndysy boıynsha, dollar baǵamy 0,02 teńgege qymbattady.

Bir AQSh dollarynyń ortasha baǵamy — 499,11 teńge.

Kurs.kz málimetinshe, qazirgi ýaqytta Almatynyń aqsha aıyrbastaý pýnktterinde dollar 500 teńgeden satylyp jatyr, satyp alý baǵamy — 498 teńge. Eýro 519 — 523 teńge aralyǵynda qubylyp tur.

Al, Astana qalasy boıynsha dollardy satý baǵamy — 502 teńge, satyp alý quny — 496 teńge. Eýro 524 teńgeden satylyp, 517 teńgeden satyp alynady.

Dál qazirgi ýaqytta aqsha aıyrbastaý oryndarynda Reseı valıýtasy 5,42 - 5,62 aralyǵynda saýdalanyp jatyr.

Ulttyq banktiń 3 naýryzǵa usynǵan resmı baǵamy — bir dollarǵa 499,22 teńge. Reseı rýbliniń ortasha saralanǵan quny — 5,64 teńge. Eýro — 519,14.

Osyǵan deıin Qazaqstan qarjygerler qaýymdastyǵy 2025 jyly dollar 545 teńgege deıin barýy múmkin ekenin aıtty.

Sondaı-aq Ulttyq bank valıýta aıyrbastaýdyń jańa erejesin bekitetinin málimdedi.