Konstıtýtsııalyq Sotqa Majarstan Prezıdenti keldi

ASTANA.KAZINFORM – Konstıtýtsııalyq Sottyń Tóraǵasy Elvıra Azımova Qazaqstanǵa resmı saparmen kelgen Majarstan Prezıdenti Tamash Shýıokpen kezdesti. Bul týraly quzyrly organnyń baspasóz qyzmeti málim etti.

Elvıra Azımova joǵary mártebeli qonaqty Qazaqstandaǵy konstıtýtsııalyq ózgerister úderisterimen jáne Konstıtýtsııanyń ústemdigin saqtaýdy qamtamasyz etý tetikterimen tanystyrdy.

Buǵan deıin Majarstannyń Konstıtýtsııalyq Sotyn basqarǵan Tamash Shýıok azamattardyń ótinishterin qaraý tájirıbesin, sondaı-aq quqyq ústemdigi máselelerinde ulttyq múddelerdi qorǵaýdaǵy majarstandyq konstıtýtsııalyq baqylaý organynyń tájirıbesin atap ótti.

Majarstan Prezıdenti táýelsiz ári myqty Konstıtýtsııalyq Sot demokratııalyq damýdyń jáne negizgi quqyqtardyń basty kepili ekenin atap ótip, onyń jumysy beıbit áleýmettik yntymaqtastyq rýhynda ári quqyqtyq dástúrlerdi saqtaý baǵytynda jalǵasýyn tiledi.

Eske sala keteıik, Majarstan Prezıdenti Tamash Shýıok elimizge resmı saparmen keldi. Ol Aqordada ótken BAQ ókilderine arnalǵan brıfıngte Qazaqstan men Majarstan halyqaralyq deńgeıde birlese jumys isteýge keliskenin málimdegen edi.

Búgin Oljas Bektenov pen Majarstan Prezıdenti Tamash Shýıok ekonomıkalyq yntymaqtastyq pen kelisimderdi joǵary deńgeıde júzege asyrý máselelerin talqylady.