Konstıtýtsııalyq sot saılaýdy retteıtin normalardy qaraýdan bas tartty
ASTANA. KAZINFORM — Konstıtýtsııalyq Sotqa azamattyń «Qazaqstan Respýblıkasyndaǵy saılaý týraly» Konstıtýtsııalyq zańnyń 20-1-baby 3-tarmaǵynyń 2) jáne 3) tarmaqshalarynyń jáne 39-baby 2-tarmaǵynyń, sondaı-aq Ákimshilik rásimdik-protsestik kodekstiń 84-baby birinshi bóliginiń Konstıtýtsııaǵa sáıkestigin tekserý týraly ótinishi kelip tústi. Bul týraly Konstıtýtsııalyq Sottyń baspasóz qyzmeti málim etti.
— Ótinish berýshi saılaý kúni daýys berý barysyn baqylaǵanyn, alaıda buzýshylyq týraly akt negizinde ýchaskelik saılaý komıssııasy tarapynan shettetilgenin habarlady. Ol komıssııanyń áreketterine sot tártibimen shaǵymdanǵan, alaıda sottar onyń talaptaryn qanaǵattandyrýdan bas tartqan. Ótinish berýshiniń pikirinshe, zańnama normalary sottarǵa komıssııanyń sheshimin joımaýǵa múmkindik bergen, bul onyń oıynsha, konstıtýtsııalyq quqyqtarynyń buzylýyna ákep soqqan, — delingen habarlamada.
Konstıtýtsııalyq Sot ótinishti qaraý barysynda «Konstıtýtsııalyq Sot týraly» Konstıtýtsııalyq zańǵa sáıkes azamattyń ótinishi tek daýlanyp otyrǵan zań sotta qoldanylǵan nemese naqty is boıynsha ótinish berýshiniń quqyqtary men bostandyqtaryna tikeleı áser etken jaǵdaıda ǵana qaralýǵa jatatynyn túsindirdi. Sondaı-aq Konstıtýtsııalyq Sottyń tek quqyq máselelerin qaraıtyny jáne naqty mán-jaılardy baǵalaýmen aınalyspaıtyny atap ótildi.
— Konstıtýtsııalyq Sot ýchaskelik saılaý komıssııasy saılaý komıssııalarynyń biryńǵaı júıesine kiretin, saılaý týraly zańnamanyń buzylýy anyqtalǵan jaǵdaıda sheshim qabyldaý ókilettigi bar memlekettik organ ekenin kórsetti. Saılaý komıssııasynyń sheshimi normatıvtik quqyqtyq akt bolyp tabylmaıdy. Atalǵan isti qaraý kezinde sot ótinish berýshi daýlap otyrǵan zań normalaryn máni boıynsha qoldanbaı, komıssııanyń tıisti aktini qabyldaýǵa negiz bolǵan naqty áreketterin baǵalaǵan, — dep naqtylady Sottan.
Osyny eskere otyryp jáne Konstıtýtsııalyq zańnyń 48-baby 3-tarmaǵynyń 2) tarmaqshasyn basshylyqqa ala otyryp, Konstıtýtsııalyq Sot bul ótinishtiń óz quzyretine jatpaıtyny týraly qorytyndyǵa keldi jáne ony óziniń quzyreti sheńberinde qaraýǵa negizderdiń joq ekenin rastady.