Konstıtýtsııalyq Sot beıbit jınalystardy ótkizý tártibi týraly normaǵa túsindirme berdi

ALMATY. KAZINFORM - Konstıtýtsııalyq Sot «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» Qazaqstan Respýblıkasynyń Zańynyń 11-baby 1-tarmaǵy 1-bóligi 2) men 3) tarmaqshalarynyń jáne 14-baby 1-tarmaǵy 10) tarmaqshasynyń Konstıtýtsııaǵa sáıkestigin tekserdi. 

Ótinishtiń máni:

Astana qalasynyń ákimdigi ótinish sýbektisine kórsetilgen kezeńde buryn kelisilgen is-sharalardyń ótkizilýine baılanysty beıbit jınalysty uıymdastyrýdan bas tartqan.

Ótinish berýshiniń pikirinshe, zańnyń atalǵan erejeleri jergilikti atqarýshy organdarǵa beıbit jınalys uıymdastyrýshyǵa ótkizý ornyn jáne ýaqytyn ózgertý týraly aldyn ala balama usynys jibermeı, ony ótkizýden óz betinshe bas tartýǵa múmkindik beredi, bul bas tartýdyń mólsherlestigi jáne onyń yqtımal qater dárejesi máselesin sheshpeıdi.

Konstıtýtsııalyq Sottyń qorytyndysy:

Konstıtýtsııalyq Sot tekserý qorytyndysy boıynsha Zańnyń 11-baby 1-tarmaǵy birinshi bóligi 2) men 3) tarmaqshalaryn Konstıtýtsııaǵa sáıkes dep tanydy.

Konstıtýtsııalyq Sot óz sheshiminde beıbit jınalystarǵa quqyq absolıýtti bolyp tabylmaıdy jáne Konstıtýtsııada kórsetilgendeı zańdy túrde sharttalýy múmkin ekenin kórsetti. Jergilikti atqarýshy organnyń ınternet-resýrsynda ornalastyrylatyn mamandandyrylǵan oryndardyń jumyspen qamtylýy týraly aqparat azamattarǵa kem degende josparlanǵan is-sharalar, olardyń ótkiziletin orny men kúni, olardyń bastalý jáne aıaqtalý ýaqyty, qatysýshylardyń boljamdy sany týraly naqty túsindirme berýge tıis.

Sonymen qatar Zańnyń 14-baby 1-tarmaǵynyń 10) tarmaqshasyna qatysty Konstıtýtsııalyq Sot jergilikti atqarýshy organnyń bas tartý týraly sheshim qabyldanǵanǵa deıin beıbit jınalystyń ornyn jáne (nemese) ýaqytyn ózgertý týraly usynys engizýi mindetti bolyp tabylatyn naqtylaýshy túsinikteme berdi.

Aıta keteıik, Konstıtýtsııalyq Sottyń ustanymdary men qabyldanǵan sheshimi týraly tolyq aqparatty resmı saıttan oqı alasyzdar.