Konstıtýtsııaǵa 30 jyl: raqymshylyqpen alǵashqy áıel bostandyqqa shyqty
PETROPAVL. KAZINFORM - Qazaqstan Respýblıkasy Konstıtýtsııasynyń 30 jyldyǵyna oraı jarııalanǵan raqymshylyq aıasynda Soltústik Qazaqstan oblysyndaǵy №50 mekemede jazasyn ótep jatqan alǵashqy áıel bostandyqqa shyqty.
SQO boıynsha qylmystyq-atqarý júıesi departamenti baspasóz qyzmetiniń málimetinshe, 43 jastaǵy áıel QR Qylmystyq kodeksiniń 188-baby (urlyq) boıynsha 9 aıǵa bas bostandyǵynan aıyrylǵan. Endi raqymshylyqqa iligip, onyń jaza merzimi 7 aıǵa qysqartylyp otyr.
Mekeme qaqpasynda bostandyqqa shyqqan áıeldi qyzy kútip aldy.
Qazirgi tańda óńirde 1700-den astam adam túrli mekemede jazasyn ótep jatyr. Amnıstııa aıasynda shamamen 250 adamnyń, onyń ishinde 50-den astam áıeldiń jazasy jeńildep, merziminen buryn bostandyqqa shyqpaq.
– Ár is jeke tártippen, muqııat qaralady. Basymdyq – birinshi ret sottalǵan, qoǵamǵa qaýip tóndirmeıtin, sondaı-aq áleýmettik osal topqa jatatyn áıelderge beriledi, – dep málimdedi departament ókilderi.
Mamandardyń aıtýynsha, amnıstııa týraly Zań – Qazaqstan Konstıtýtsııasynda bekitilgen gýmanızm men adamgershilik qaǵıdattarynyń aıqyn kórinisi. Bul – jaza basqandarǵa qoǵamǵa qaıta beıimdelýge, jańa ómir bastaýǵa berilgen múmkindik.
Buǵan deıin SQO-da raqymshylyqqa ilikkenderdiń alǵashqy toǵyzy bostandyqqa shyqqanyn jazǵan edik.