Konstıtýtsııaǵa 30 jyl: alǵash raqymshylyqqa ilikken kim
ASTANA. KAZINFORM – Qazaqstan Respýblıkasy Konstıtýtsııasynyń 30 jyldyǵyna oraı raqymshylyq jasaý týraly zańy aıasynda alǵashqy sottalýshy bostandyqqa shyqty. Bul týraly Іshki ister mınıstrligi Qylmystyq-atqarý júıesi komıteti habarlady.
- Er adam urlyq jasaǵany úshin jazasyn ótep jatqan, buǵan deıin sottalmaǵan. Ony úıinde úsh balasy men jubaıy kútip otyr. Qostanaı oblysy boıynsha qylmystyq-atqarý júıesi departamentine qarasty mekemelerde shamamen 2000 adam jazasyn ótep jatyr. Qazaqstan Respýblıkasy Konstıtýtsııasynyń 30 jyldyǵyna oraı, 300 sottalǵan adamǵa raqymshylyq qarastyrylǵan. Búgin osy zańǵa sáıkes alǵashqy sottalǵandar bostandyqqa shyqty. Bul jazasyn óteýshilerdiń ómirindegi mańyzdy kezeń, jańa ómirdi taza paraqtan bastaýǵa, qoǵamǵa tolyqqandy oralýǵa múmkindik beredi, - delingen habarlamada.
Komıtetten túsindirgendeı, raqymshylyq – jaı ǵana keshirim aktisi emes, árbir azamattyń túzelip, el damýyna óz úlesin qosýǵa múmkindigi bar bolashaqqa salynǵan ınvestıtsııa.
- Raqymshylyq aıasynda bosatylǵan adamdarǵa jańa ómir jaǵdaıyna beıimdelý úshin qajetti qoldaý kórsetilip jatyr. Olar jumysqa ornalasýǵa, áleýmettik baılanysty qalpyna keltirýge jáne qajetti qujatty alýǵa kómek alady. Maman-psıhologtar psıhologııalyq kómek kórsetip, jańa daǵdyny meńgerýge jáne qoǵamǵa tez sińip ketýine járdemdesip jatyr. Qoǵam mundaı adamdarǵa túsinistikpen qarap, olarǵa qalypty ómirge oralýǵa jáne qoǵamǵa paıdaly múshe bolýǵa múmkindik berýi mańyzdy. Tek birlesken kúsh-jiger arqyly biz olardyń qaıta áleýmettenýine jáne quqyq buzýshylyqtyń aldyn alýǵa qolaıly orta jasaı alamyz. Raqymshylyq – bul aqylmen jáne jaýapkershilikpen paıdalanýǵa tıis múmkindik.
Aıta ketsek, 2025 jylǵy 23 maýsymda Prezıdent raqymshylyq týraly zańǵa qol qoıdy.
Sondaı-aq raqymshylyqqa qylmystyq jazasynyń sońǵy jyly qalǵandar bosatylatyny týraly jazǵan edik.