Konstıtýtsııalyq Sotta atyraýlyq turǵynnyń ótinishi qaraldy
Konstıtýtsııalyq sotqa bıylǵy 24 qańtarda azamat E.Dosmaǵambetovten «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasy Kodeksiniń 610-baby 1-tarmaǵy 1) tarmaqshasynyń jáne 2-tarmaǵynyń Konstıtýtsııaǵa sáıkestigin qaraý týraly ótinish túsken.
«Azamat óziniń aryzynda daýlanyp otyrǵan norma Qazaqstan Respýblıkasy Konstıtýtsııasynyń 13-babynyń 2-tarmaǵyn, 14-babyn, sondaı-aq 1948 jylǵy 10 jeltoqsandaǵy BUU Bas Assambleıasynyń 217 A (III) qararymen qabyldanǵan Adam quqyqtarynyń jalpyǵa birdeı deklaratsııasynyń 7-babyn jáne 1966 j. 16 jeltoqsanda qabyldanǵan jáne 2005 jylǵy 28 qarashadaǵy №91-III zańmen ratıfıkatsııalanǵan Azamattyq jáne saıası quqyqtar týraly halyqaralyq paktiniń 2-babyn buzady dep kórsetken. Buǵan deıin 2018 jyly shyǵarylǵan sot sheshimimen kelispegendikten, azamat sot aktilerine Joǵarǵy Sotqa shaǵymdanǵan. Alaıda aryzdanýǵa baılanysty belgilengen memlekettik baj (ótinish berýshi habarlaǵandaı, shamamen 2 mln teńge mólsherinde) onyń Qazaqstan Respýblıkasy Konstıtýtsııasynyń 13-babynyń 2-tarmaǵynda kózdelgen sot qorǵaýyna quqyǵyn shekteıdi. 2018 jyldan bastap E.N.Dosmaǵambetov Joǵarǵy Sotqa ótinishpen úsh ret júgingen. Ótinish ıesiniń aryzyn memlekettik bajdy tólemeýine baılanysty qaraýdan bas tartqan», -dep habarlady Konstıtýtsııalyq sottan.
Ótinishtiń máni boıynsha Konstıtýtsııalyq Sot Parlament Senatynyń, Bas prokýratýranyń, qarjy, ádilet jáne Ulttyq ekonomıka mınıstrlikteriniń, adam quqyqtary jónindegi ýákildiń ókilderin tyńdaǵan. Sondaı-aq Respýblıkalyq notarıattyq palatanyń, Respýblıkalyq advokattar alqasynyń, Qarjy jáne salyq quqyǵy ǵylymı-zertteý ınstıtýtynyń jáne Kaspıı ýnıversıtetiniń qorytyndylaryn zerdelegen.
Konstıtýtsııalyq Sotta azamattyń múddesin advokat qorǵady.
